Исроил ўғирланган болалар учун товон тўлайди
Исроил давлати ташкил топган 1948 йилдан кейиги дастлабки йилларда ўғирланган минглаб болалар учун ҳукумат товон тўлайдиган бўлди. “Евроньюс”нинг хабар беришича, Исроил ҳукумати болалар ўғирлангани учун таассуф билдириб, фарзандларидан айрилган оилаларнинг изтиробларини тан олишини айтган.
“Исроил давлати гўдакларидан ажралган оилаларни тан оладиган ва моддий компенсация тўланадиган вақт келди”, – дейилади бош вазир Биньямин Нетаньяҳунинг баёнотида. Ҳукумат раҳбари болаларнинг ўғирланишини “Исроил тарихидаги оғриқли ҳодисалар” деб атаган.
Ҳукуматнинг қарорига биноан товон тариқасида 162 миллион шекел (50 миллион АҚШ доллари) тўланадиган бўлди. Ўғирланган фарзандининг тақдири номаълум бўлган ҳар бир оилага 200 минг шекелдан берилади.
Исроил давлати ташкил топган дастлабки йилларда араб ва Болқон давлатларидан келган яҳудий оилаларнинг фарзандлари ўғирланиб, Шарқий Европадаги бефарзанд яҳудий оилаларига берилган. Тахминларга кўра, ўша йилларда 5 мингга яқин бола ўғирланган.
