Ишга қабул қилишни қонунга хилоф равишда рад этиш ҳолатига қандай чора кўрилади?

Ҳуқуқий муносабат

Баъзи инсонларнинг маълумоти ва хат-ҳужжати жойида бўлсада, иш қидириб ташкилотма ташкилот юргани гувоҳи бўламиз. Уларнинг ишга қабул қилинишида рад этишлар эса турли хил бўлади.

Демак, биз иш сўраб борган ташкилотнинг қабул қилмаслиги қонун доирасига тўғри келиш-келмаслигини ҳам билишимиз лозим. Бу борада Тошкент давлат юридик университети Юридик клиникаси раҳбари Отабек Нарзиев батафсил маълумот берди.

–Ўзбекистон Республикаси Меҳнат кодексининг 119-моддасига кўра, қуйидагилар ишга қабул қилишни қонунга хилоф равишда рад этишдир. Хусусан, меҳнат ва машғулотлар соҳасида камситишни тақиқлаш тўғрисидаги талабларни бузиш, иш берувчи томонидан ишга таклиф этилган шахсларни ишга қабул қилмаслик, иш берувчи қонунга мувофиқ меҳнат шартномасини тузиши шарт бўлган шахсларни ишга қабул қилмаслик, ҳомиладорлик ёки фарзандлар борлиги билан боғлиқ сабабларга кўра ишга қабул қилмаслик ҳамда судлангани, шу жумладан тугалланган ва олиб ташланган судлангани сабабли шахсларни ишга қабул қилмаслик каби холатларда ишга қабул қилмаслик қонунга хилоф ҳисобланади.

–Ишга қабул қилишни рад этиш сабаблари қадай усулда ва қанча муддатда шахсга тақдим этилиши керак?

–Ишга қабул қилиш рад этилган тақдирда, иш берувчи ишга қабул қилиш ҳуқуқига эга бўлган мансабдор шахс томонидан имзоланган ишга қабул қилишни рад этиш сабабларининг ёзма асосини ишга қабул қилиниши рад этилган шахснинг талабига кўра уч кунлик муддатда тақдим этиши шарт.

–Ишга қабул қилишни рад этганлик тўғрисида ёзма асос берилмаса, қонунга хилоф равишда рад этилганлик учун шикоят қилса бўладими?

–Ёзма асосни беришни рад этиш ишга қабул қилиш қонунга хилоф равишда рад этилгани устидан шикоят қилинишига монелик қилмайди.

Ишга қабул қилиш қонунга хилоф равишда рад этилган деб ҳисоблайдиган шахс қонунга хилоф равишда рад этилганлиги факти устидан белгиланган тартибда шикоят қилиши, шу жумладан тегишли ишни тақдим этиш, ўзига етказилган моддий зарарнинг ўрнини қоплаш ва маънавий зиённи компенсация қилиш тўғрисидаги ариза билан судга мурожаат қилиши мумкин.

–Ишга қабул қилишни рад этиш қонуний асосини исботлаш кимнинг зиммасида бўлади?

–Ўзбекистон Республикаси Меҳнат кодексининг 120-моддасига кўра, низоларни кўриб чиқиш чоғида ишга қабул қилишни рад этишнинг қонунийлигини исботлаш вазифаси иш берувчининг зиммасига юклатилади.