Ҳиндистон дунёдаги энг катта дата-марказни қуришни бошлади

Ҳиндистон жаҳонда дата-марказлар бўйича етакчи бўлишга ҳозирланмоқда, дейилади Bloomberg хабарида.
Миллиардер Мукеш Амбани бошчилигидаги Reliance гуруҳи Гужарат штатининг Жамнагар шаҳрида дунёдаги энг йирик дата-марказни қуришни бошлади. Унинг қуввати 3 гигаватт, яъни жаҳонда ишлаб турган энг катта дата-марказлар кўрсаткичидан уч карра юқори.
Ушбу дата-марказ сунъий интеллектда ишловчи инфратузилманинг асосини ташкил қилади. Лойиҳа энг янги технологияларга асосланган, жумладан, Nvidiaнинг энг кучли яримўтказгичларидан фойдаланилади, натижада маълумотларни ишлаш қиймати сезиларли даражада қисқаради. Генератив сунъий интеллект билан боғлиқ вазифалар, хусусан, чат-ботлар, маҳсулдорликни оширувчи воситаларда бу жуда муҳим.
Reliance марказни тикланувчи энергия ёрдамида ишлатмоқчи. Жамнагар яқинида қуёш панеллари, «яшил» водород ва шамол парраклари тизимларини ишлаб чиқарувчи улкан мажмуа қурилмоқда. Шунга қарамасдан, мунтазам энергия таъминоти учун қазилма ёқилғи ва аккумулятор тизимларига ҳам эҳтиёж туғилиши мумкин.
Мукеш Амбани. Фото: Октагон.Медиа
Мукеш Амбани мақсади дунёдаги энг арзон сунъий интеллект хизматларини яратиш ва ҳиндистонлик фойдаланувчиларга кўпроқ имкониятлар муҳайё этиш эканлигини таъкидлади. Шу тариқа жаҳоннинг энг кўп аҳоли яшовчи мамлакатида сунъий интеллект тараққиёти учун янги уфқлар очилиши айтилмоқда.
Энг катта дата-марказ ишга тушгач, Ҳиндистон нафақат жаҳон сунъий интеллект бозори етакчиларидан бирига айланади, шунингдек, инновацион технологиялар ва барқарор энергетика соҳасига янги стандартларни олиб киради.