Германия Оролбўйи минтақаси учун 700 минг доллар ажратади

Инвестициялар, саноат ва савдо вазирлигида БМТнинг Оролбўйи минтақаси учун Инсон хавфсизлиги бўйича кўп томонлама шериклик Trast жамғармаси фаолиятини янада қўллаб-қувватлаш тўғрисидаги битимни имзолаш маросими бўлиб ўтди. Бу ҳақда вазирлик матбуот хизмати хабар берди.

Маросимда Ўзбекистон инвестициялар, саноат ва савдо вазирининг ўринбосари Сарвар Ҳамидов, Германиянинг Ўзбекистондаги элчиси Тило Клиннер, БМТнинг Ўзбекистондаги доимий мувофиқлаштирувчиси вазифасини бажарувчи Консуэло Видаль иштирок этди.

Ҳужжатда Германия ҳукуматининг Оролбўйи бўйича Trast жамғармасига 700 минг доллар ажратилиши кўзда тутилган. Маблағлар мураккаб экологик вазиятнинг минтақа аҳолисига салбий таъсирини камайтиришга қаратилган манзилли қўллаб-қувватлаш чора-тадбирларига йўналтирилади.

Маълумот учун, жами Trast жамғармасининг устувор йўналишлари доирасида Қорақалпоғистоннинг Беруний, Тахтакўпир, Бўзатов, Қўнғирот ва Мўйноқ туманлари ҳамда Нукус шаҳрида 7 та лойиҳа амалга оширилиб, 16 миллион доллардан ортиқ маблағ жалб этилган.

Шу жумладан:

• 5 та чекка қишлоқнинг 11 минг нафар аҳолиси тоза ичимлик суви билан таъминланган, 17 та аҳоли пунктида 8 минг 922 нафар қишлоқ аҳолиси барқарор электр энергияси билан таъминланди;
• 13 та хусусий корхона ва 3 та қишлоқ хўжалиги кооперативи ташкил этилган;
• ўрмон хўжалигида кўчат етиштириш 2200 гектардан 5000 гектарга, кўчат етиштириш 8 тоннадан 65 тоннага кўпайтирилган;
• АКТ ускуналари ўрнатилиши ва бепул Wi-Fi зоналари яратилиши туфайли 64 минг нафар қишлоқ аҳолиси интернет ва рақамли хизматлардан фойдаланиш имкониятига эга бўлган:
• 3 та перинатал марказ модернизация қилинган, 20 минг нафар она ва янги туғилган чақалоққа тиббий хизмат кўрсатиш сифати яхшиланган;
• 40 минг нафар бола ва ўсмир дегелминтизациядан ўтказилган, 131 минг нафар қиз болада камқонликка қарши профилактика чоралари кўрилган;
• Қорақалпоғистонда фаолият кўрсатаётган 31 та тиббиёт муассасаси лаборатория жиҳозлари ва телекоммуникация воситалари билан таъминланган;
• 730 нафар тиббиёт ходими қайта тайёрланган, 1500 оила соғлом турмуш тарзи бўйича курсларда малака оширган.

“Германия ҳукумати билан келишув имзоланиши халқаро ҳамжамиятнинг Орол денгизи инқирозидан жабр кўрган одамларнинг экологик, иқтисодий ва ижтимоий муаммоларини ҳал этиш бўйича умумий саъй-ҳаракатларини қўллаб-қувватлашга содиқлигини тасдиқлайди”, — дейилади хабарда.