"Ғалаба қозонишим аниқ эди": Берлускони Италия президентлиги учун курашишдан бош тортди

Италиянинг собиқ бош вазири Сильвио Берлускони мамлакат президентлигига номзодини қўйиш режаларидан воз кечишга қарор қилди, деб хабар бермоқда Италия телевидениеси.

“Коллектив манфаатлар шахсий мақсадлардан муҳимроқ эканини ҳеч қачон унутмаган ҳолда, мен кўп ўйладим, қариндошларим ва «сиёсий» оилам раҳбарлари билан келиб тушган таклиф ҳақида маслаҳатлашдим”, деди Берлускони ўзининг партиядошларига йўллаган мактубида.

«Бугун Италияга пандемияга қарши курашиш ва мамлакатни инқироздан олиб чиқиш учун бирдамлик керак», дея қўшимча қилди сиёсатчи.

Берлускони маслаҳатлашувлар чоғида у сайловда ғалаба қозониши мумкин деган хулосага келганини, аммо барибир уларда қатнашишдан бош тортганини айтди. У буни «бирликка муҳтож бўлган мамлакатда» нифоқдан қочиш истаги билан изоҳлади.

Берлусконининг сиёсий рақиблари сўнгги кунларда унинг номзодига кескин қарши чиқишди. Собиқ бош вазирнинг ўзи Италиянинг президенти сифатида эмас, балки унинг манфаати учун ишлашда давом этишини айтди.

Берлускони Италия Бош вазири Марио Драгини CОVID-19 пандемияси ва бошқа жиддий муаммоларга қарши курашиш учун ўз лавозимида қолишга чақирди. Аввалроқ Италия ОАВлари Драгининг ўзи, баъзи маълумотларга кўра, бош вазир бўлиб қолиши ёки президентликка ариза бериши ҳақида ўйлаётгани ҳақида хабар берган эди.

Италияда 24 январь куни давлат раҳбарини сайлаш жараёни бошланади. Унда парламентнинг иккала палатаси, шунингдек, Италия минтақалари вакиллари иштирок этади.