Фарғоналик эркак 6 нафар талабани чув тушириб кетди
Бош прокуратура ҳузуридаги Департамент ҳамда ДХХнинг Қува тумани бўлимлари томонидан ўтказилган тезкор тадбирда, фуқаро А.Н. Гулистон давлат университетига суперконтракт асосида ўқишга кирган Г.нинг контракт тўлови миқдорини танишлари ёрдамида 8,7 млн сўмга камайтириб бериш эвазига талабанинг онаси Х.дан 1 800 АҚШ доллари ҳамда Ўш тиббиёт институти талабаси Д.нинг ўқишини Тошкент педиатрия институти Фарғона филиалига кўчириб бериши эвазига 3 000 АҚШ доллари талаб қилиб, шундан 2 000 АҚШ долларини фирибгарлик йўли билан олган вақтида ашёвий далиллар билан ушланган.
Шунингдек, терговга қадар текширувда А.Н. Ўш тиббиёт институтининг 3 нафар талабаларининг ўқишини Андижон тиббиёт институти ва Тошкент тиббиёт академиясига кўчириб бериши эвазига жами 10 000 АҚШ долларини ҳамда Наманган Давлат Университетига суперконтракт асосида ўқишга кирган О.нинг контракт тўловини ўзига қарашли фирма орқали тўлаб бериш эвазига 1 400 АҚШ долларини фирибгарлик йўли билан қўлга киритганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
