Facebook узилишлар оқибатида қанча маблағ йўқотгани маълум бўлди
4 октябрь куни юзага келган узилишлар оқибатида Facebook компанияси қарийб 100 млн доллар йўқотди, дея ёзмоқда Fortune нашри.
Душанба куни Тошкент вақти билан тахминан кечки 20:30 да Facebook, Instagram, WhatsApp ва Messenger платформаларида бутун дунё бўйлаб узилиш юзага келди. Узилишлар Тошкент вақти билан тонгги соат 4:00 га қадар — тахминан етти ярим соат давом этган.
Fortune ҳисоб-китобларига кўра, етти ярим соатлик узилишлар натижасида Facebook тахминан 99,75 млн доллар даромаддан маҳрум бўлган.
Нашрнинг ёзишича, ҳисоб-китоблар компаниянинг иккинчи чоракдаги ҳисоботига асосланган. Иккинчи чорак натижаларига кўра, компаниянинг 91 кунлик даврдаги даромади 29,08 млрд доллардан зиёдни ташкил этган. Бу кунига ўртача 319,6 млн доллар ёки соатига 13,3 млн доллар дегани.
«Корреспондент» нашрининг ёзишича, рекламаларни баҳолаш бўйича хизмат кўрсатувчи Standard Media Index компанияси Facebook`нинг узилишлар вақтидаги йўқотишларини 3,3 миллион долларга баҳолади. Бироқ, Standard Media Index фақатгина компаниялар ўз маҳсулотларини Facebook иловаларида реклама қилиш учун сарф қиладиган маблағлар ҳисоб-китобларига таянган.
«Айни пайтда Forrester бозор тадқиқотлари компанияси вице-президенти Майк Прунинг сўзларига кўра, Facebook ва Instagramда ўз рекламаларини жойлаштирувчи 10 млнга яқин компания ва брендлар асосли равишда кўрилган зарарни қоплашни талаб қилишлари мумкин — эҳтимол бепул реклама кўринишида», — деб ёзмоқда «Корреспондент».
The New York Times нашрига кўра, узилишлар вақтида, Facebook платформаларидан фойдаланадиган айрим компанияларнинг савдоси ўтган ҳафтага нисбатан 30−70 фоизга қисқарган.
Forbes нашри платформадаги носозлик сабаб компания акциялари нархи 4,8 фоизга пасайгани ва оқибатда Марк Цукерберг 5,9 млрд доллар йўқотганини маълум қилди.
Forbes`га кўра, Facebook`да бундай носозлик охирги марта 2019 йилда юзага келган эди (14 соатлик узилиш). 2008 йилда эса платформа бир сутка давомида ўчиб қолган эди.
Олдинроқ, ушбу узилишлар сабабли 70 млнга яқин фойдаланувчи Telegram`га кўчиб ўтгани ҳақида хабар берилган эди. Павел Дуров янги фойдаланувчиларни «уялтириб қўймаслигини» таъкидлаган эди.
