Эронда намойишчилар мамлакат олий етакчиси Хомейнийнинг ҳайкалига ўт қўйди

Эронда ҳижобга ва ҳукуматга қарши норозилик акциялари доирасида намойишчилар олий етакчи Али Хомейнийнинг ўзи туғилиб-ўсган Машҳад шаҳридаги ҳайкалига ўт қўйди. Воқеа акс этган видео ижтимоий тармоқларда тарқалди.

Эронда 22 ёшли Маҳса Аминийнинг ўлимидан кейин бошланган норозиликлар бир ҳафтадан буён давом этмоқда. У ҳижобни «нотўғри» ўрагани учун ахлоқ полицияси томонидан ҳибсга олинган, сўнг полиция участкасидан касалхонага олиб кетилган ва у ерда вафот этган эди.

Илк акциялар 16 сентябрь куни, қиз вафот этган куни бошланди. Ўшандан буён норозиликлар ўнлаб шаҳарларни қамраб олди. Уларнинг иштирокчилари баррикадалар қуриб олиб, «Диктаторга ўлим» ва «Аёл, ҳаёт, эркинлик» шиорларини баралла айтмоқда. Ҳуқуқ-тартибот органлари ходимлари акцияларни шафқатсизлик билан тарқатмоқда — ўнлаб одамлар ҳалок бўлди, юзлаб кишилар жароҳатланди.

Иран Human Rights ҳуқуқни ҳимоя қилиш ташкилоти маълумотларига кўра, намойишлар чоғида камида 31 киши ҳалок бўлган.

Норозиликлар бошлангач, Эрон ҳукумати интернетни чеклашга киришди, кейинроқ эса уни умуман ўчириб қўйди.

Эрон президенти Иброҳим Раисий БМТ Бош Ассамблеяси сессияси доирасидаги матбуот анжуманида «Эронда фикр билдириш эркинлиги» мавжудлигини, аммо тартибсизлик яратишга қаратилган хатти-ҳаракатлар номақбуллигини айтди.