Эрон президенти суннийларнинг камдан-кам ҳолларда юқори лавозимга тайинланишини маъқуллади
Эрон президенти Масуд Пезешкиан ўтган ҳафта сунний озчиликдан бўлган сиёсатчини қишлоқ тараққиёти бўйича вице-президент этиб тайинлади, дея хабар беради расмий ОАВ.
«Президентнинг фармони билан Абдолкарим Ҳусайнзода қимматли тажрибаси туфайли мамлакатнинг қишлоқ ва ноқулай ҳудудларини ривожлантириш бўйича вице-президент лавозимига тайинланди», — дейилади президент сайтида.
Сунний мусулмонлар Эрон аҳолисининг қарийб 10% ни ташкил қилади ва 1979 йилги инқилобдан кейин камдан-кам ҳолларда асосий ҳокимият лавозимларини эгаллаб келади, шундан сўнг шиа исломи расмий давлат дини сифатида тан олинган.
Юқори лавозимга тайинланган 44 ёшли ислоҳотчи, асли курд бўлган Ҳусайнзода 2012 йилдан бери Эрон парламентида шимоли-ғарбий Нағаде ва Ошнавие шаҳарлари вакили бўлиб келган. Сиёсатчи бир неча бор Эрондаги суннийлар ҳуқуқларини ҳимоя қилиб чиққан.
Амалдаги президент Масуд Пезешкиан ўзининг сайловолди кампаниясида суннийлар ва этник озчиликларга, жумладан курдлар ва озарбайжонларга нисбатан камситишларга қарши чиқди.
Эътиборлиси, ислоҳотчи президент Пезешкианнинг ўзи этник озарбайжон. Дастлабки интервьюсида Пезешкиан Озарбайжоннинг Меҳобод шаҳрида туғилганини ва «фарзандларимнинг уйда форс тилида гаплашишига ҳеч қачон рухсат бермаганини» айтди.
