Гонконг ОАВ Ўзбекистон туризмига юқори баҳо берди: визасиз режим ва тўғридан-тўғри рейслар кутилмоқда

“HK TVB News Today” телеканали орқали Гонконг ва Ўзбекистон ўртасида визасиз режим муддати узайтирилаётгани ҳамда икки мамлакат ўртасида тўғридан-тўғри рейслар йўлга қўйилиши кутилмоқда экани, шунингдек, Гонконг сайёҳлик агентликлари икки томонлама туризмни ривожлантиришга умид билан қараётгани ҳақида материал эълон қилинди.

“Жорий йилнинг март ойида Ўзбекистон пойтахти Тошкентда очилган Ислом цивилизацияси маркази мамлакатнинг ноёб архитектура тимсолига айланди. У технологик ютуқларни ўзида мужассам этган ҳолда анъанавий ислом эстетикасини намойиш этади. Унинг коллекциясида бизгача етиб келган дунёнинг энг қадимий қўлёзмаларидан бири бўлган Қуръони Каримнинг “Усмон Мусҳафи” мавжуд”, дейилади кўрсатувда.

Материалда Хитойдан Ўзбекистонга келган сайёҳ Ни хонимнинг фикрлари ҳам келтирилган: “Ислом цивилизацияси марказининг қурилиши исломий анъаналардан келиб чиққан. Уларнинг нақшлари ва безаклари жуда мураккаб бўлиб, бу Хитой архитектурасидан кескин фарқ қилади”.

“Ўзбекистонга хос архитектурани ҳамма жойда учратиш мумкин, жумладан, метро станцияларида. Тошкент Марказий Осиёдаги энг қадимий ва энг узун метро линиясига эга. Шунингдек, пойтахтда 375 метр баландликдаги телеминора мавжуд бўлиб, у сайёҳлар учун шаҳарни кузатув майдони сифатида ҳам хизмат қилади.

Ўзбекистон сўнгги йилларда виза тартибини юмшатиш ва транспорт инфратузилмасини яхшилаш орқали туризм индустриясини жадал ривожлантирмоқда. Ўтган йили мамлакат ўн бир миллиондан ортиқ хорижий сайёҳни қабул қилди.

Хитой Халқ Республикаси Сянган (Гонконг) махсус маъмурий ҳудуди администрацияси раҳбари Ли Сзячао бошчилигидаги делегациянинг Ўзбекистонга ташрифи давомида сайёҳлар учун визасиз муддатни 10 кундан 30 кунгача узайтиришга келишиб олинди, шунингдек, икки давлат авиакомпаниялари ўртасида тўғридан-тўғри парвозларни йўлга қўйиш бўйича ҳам дастлабки келишувга эришилди.

Визасиз муддатни ўттиз кунгача узайтириш жуда фойдали бўлади, чунки сайёҳлар учун одатда ўн кун етарли эмас. Агар келажакда Тошкентга тўғридан-тўғри рейслар бўлса, бу сайёҳлик гуруҳлари учун жуда қулай бўлади. Ҳозирда Гонконгликлар жуда кам одам Ўзбекистонга саёҳат қилади, чунки улар бошқа мамлакатлар орқали Тошкентга транзит рейслар орқали боришни ёқтирмайдилар”, деб ёритилган материалда.

Шунингдек, кўрсатувда Гонконг сайёҳлик агентликлари ассоциацияси президенти Йип Хингнинг интервьюси берилган: “Яқин Шарқдаги урушлар бошланганидан кейингина биз бу йўналишни ривожлантириш учун ишлашимиз кераклигини тушундик. Саёҳат қилишда энг муҳими — хавфсизлик. Мен Ўзбекистон барча учун жуда хавфсиз эканлигини кўрдим. Ҳатто тунда меҳмонхонадан ташқарига чиқишдан ташвишланишга ҳожат йўқ”.

Маълумот учун, жорий йилнинг 6-июнь куни мамлакатимизга Гонконгдан бир гуруҳ туризм компанияларининг 70 дан ортиқ вакили ташриф буюради. Ташриф давомида делегация аъзолари Тошкент, Самарқанд ва Бухоро йўналишларида мамлакатимизнинг туризм салоҳияти билан таништирилади.

Маълумки, Гонконг Осиё минтақасининг энг йирик молиявий, бизнес ва логистика марказларидан бири ҳисобланади. Шу боис Ўзбекистон учун мазкур ҳудуд нафақат туристик бозор, балки инвестиция ва халқаро ҳамкорлик нуқтаи назаридан ҳам муҳим стратегик йўналиш саналади.