ЕЧЛ тарихидаги энг яхши ассистентлар номи маълум қилинди (топ-10)

Футболдаги энг қийин иш бу гол уриш деб кўп айтилади. Аммо бу голни яралишига ёрдам берадиган ассистентлар кўпинча эътиборимиздан четдан қолади. Бугун биз ЕЧЛ турнири тарихидаги энг яхши 10 та ассист муаллифлари билан сизни таништирмоқчимиз.
(Эслатма: Ибрагимович ва Фабрегас ҳам 28 та ассистга эга. Аммо улар ҳар 90 дақиқада бир ассист қилиш борасида пастроқ кўрсаткич қайд этган.)

10. Кевин Де Брюйне – 28 та

Де Брюйне АПЛда 100 дан ортиқ ассистларни амалга оширган. У Европа саҳнида ҳам ўзига хос натижа қайд этиб турибди. Бельгиялик ярим ҳимоячи яқиндагина тарихда илк бор "Манчестер Сити" билан ЕЧЛ бош совринини қўлга киритган эди. Афсуски, шундай футболчи ҳозир жароҳати сабабли узоқ муддат майдондан четда қолмоқда.

9. Томас Мюллер – 29 та

Мюллер футбол оламида барқарорлик рамзига айланиб улгурган. "Бавария" сафида 15 йилдан бери бир хил даража қайд этиб келаётган қаҳрамонимиз, ЕЧЛда 29 та ассистга эга. Мюллер "Барселона"ни 8-2 га ютишда 3 та голда иштирок этганди. У 2020 йилда сўнгги бор ЕЧЛни ютган.

8. Андреас Иньеста – 29 та

Испаниялик афсона ўзи қатнашган барча финалларда ғолиб чиққан. Уни кўпчилик барча даврларнинг энг яхши ярим ҳимоячиси деб аташади. Иньеста бир пас билан бутун рақиб ҳимоясини бузиб ташлаш қобилиятига эга эди. Унинг ЕЧЛдаги сўнгги ассисти 2015 йилнинг финалида, "Ювентус"га қарши ўйинда амалга оширилади.

7. Карим Бензема – 29 та

Бенземани винога ўхшатишади. У вақт ўтган сайин фақатгина яхшиланиб борди. 30 ёшидан кейин француз ҳужумчиси катта ишларни қила олди. 2021/22 йилги чемпионликка Бензема "Реал"ни ўз елкасида кўтариб олиб чиққанини унутмаслик лозим. Европани тарк этиб улгурган қаҳрамонимиз, 29 та ассистга эгалик қилади.

6. Хави – 30 та

Испан маэстроси деярли икки декада давомида "Барселона" ярим ҳимоясининг ҳаракатлантирувчи кучи бўлди. Айни дамда у севимли жамоаси билан Испания ва Европани қайта забт этишга интилмоқда.

5. Райан Гиггз – 30 та

Гиггз "Манчестер Юнайтед"да 1990 йилдан то 2014 йилга қадар ҳаракат қилган эди. У футбол трендларига йиллар мобайнида мослашиб борди. Ўзининг олтин йилларини уэльслик ярим ҳимоячи ажойиб ўтказади. ЕЧЛ кубоги Гиггзга икки бор насиб этади.

4. Неймар – 33 та

Неймар ЕЧЛ тарихига ўзига хос футболчи сифатида кирган. У 2014/15 йилги мавсумда "Барса"ни чемпионга айлантиради. 2020 йилда эса "ПСЖ" билан финалга қадар етиб боради. Бразилия терма жамоаси аъзосининг ўйинларини кўриш ҳаммага завқ бағишлар эди. Бу рўйхатдаги энг ёш футболчи бўлишига қарамай, ҳозирда Неймар Саудия Арабистонига йўл олган.

3. Анхель Ди Мария – 38 та

Неймар каби Ди Мария ҳам ҳаётида бир мартагина ЕЧЛ бош совринига эга чиққан. Шунга қарамай, у турнир тарихида ўз ўрнига эга. Аргентиналик афсона 2014 йилги финалнинг энг яхши футболчиси дея эътироф этилганди. Унинг чап оёғи, Ди Мариянинг асосий қуроли бўлган.

2. Лионель Месси – 40 та ассист

Месси ЕЧЛ тарихида иккинчи энг яхши ассистент сифатида қолди. У бу турнирда 129 та гол ва 40 та ассист қилишга улгурган. Мессининг 2011 йилги финалдаги "МЮ"га қарши ўйини тарихдаги энг яхшиларидан бири эди. Мухлислар уни яна Европага қайтишига умид қилишади. Балки шундай бўлар. Яна ким билади дейсиз.

1. Криштиану Роналду – 42 та ассист

Роналду бўлмай, яна ким ҳам бўларди? Роналду гол уриш борасида ҳаммага яхши таниш. Аммо унинг ижодкорлик маҳорати ҳам юксак эди. Турнир тарихидаги энг кўп голлар муаллифи, энг кўп ассист эгаси ҳам айнан у. Роналду бош совринни 5 бор қўлга кирита олган. Шунчаки, даҳшат!