БМТ Туризм билан Ўзбекистоннинг туризм соҳасидаги ташаббусларини амалга ошириш бўйича музокаралар ўтказилди
Жорий йилнинг 15 май куни Туризм қўмитаси раиси Умид Шадиев ва БМТ Туризм Ижрочи директори Зорица Уросевич ўртасида онлайн тарзда учрашув бўлиб ўтди.
Хориж томон Ўзбекистон Республикаси Президенти Ш.М.Мирзиёев ташаббуси билан 2027 йил БМТ доирасида «Халқаро барқарор ва яшовчан туризм йили» деб эълон қилинганлиги муносабати билан илиқ табриклади.
Мулоқот давомида Давлат Раҳбари томонидан БМТ Туризм Бош Ассамблеясининг 25-сессиясида илгари сурилган таклиф ва ташаббусларни амалга ошириш механизмлари атрофлича кўриб чиқилди ва тасдиқланган чора-тадбирлар ижроси ҳолати муҳокама қилинди.
Ҳозирда ҳар бир ташаббусни юқори даражада ва сифатли амалга ошириш мақсадида мутасадди ташкилотлар мутахассисларидан иборат мувофиқлаштирувчи ишчи гуруҳлари тузилган бўлиб, Туризм қўмитаси улар билан доимий мулоқот ўрнатган.
БМТ доирасида қабул қилиниши кўзда тутилаётган «Глобал хавфсиз туризм кодекси» жорий йилнинг 10-11 июнь кунлари Барселона шаҳрида (Испания) ўтадиган Ташкилот Ижроия кенгашининг 121-йиғилиши кун тартибига киртилиши ҳамда бошқа давлатлар ҳаммуаллифлигини ишлаб чиқиш борасида келишувга эришилди.
Ёшлар ўртасида сайёҳликни ривожлантириш лойиҳалари ҳамда янги ғояларни яратишда муҳим ва самарали майдонга айланиши кутилаётган Жаҳон ёшлар туризми саммитини 2025 йилда Тошкент шаҳрида ўтказиш масаласи ўзаро маъқулланди.
Шунингдек, тарихий шаҳарлар кенгашини тузиш, «яшил» туризмни ривожлантириш бўйича халқаро Ҳаракатлар дастурини қабул қилиш, Ипак йўлида туризм мукофотини жорий қилиш каби таклифларни амалга оширишни жадаллаштириш ҳамда бу масалаларда БМТга аъзо мамлакатлар қўллаб-қувватловини олиш учун қўшма чора-тадбирларни ташкил қилишга ҳам келишиб олинди.
