БАА ёғингарчиликни кўпайтириш учун олимларни жалб этмоқчи
Бирлашган Араб Амирликларида ёғингарчиликни кўпайтиришга қаратилган National Rain Enhancement Programme деб аталувчи дастурнинг янги босқичи бошланди.
Gulf News нашрининг хабар беришича, мазкур дастур 2015 йилдан бери амалга ошириб келинмоқда, унинг асосий мақсади қурғоқчиликка қарши ёрдам бера оладиган халқаро олимлар ва тадқиқотчиларни жалб этишдир. БАА Метеорология ва сейсмология миллий маркази тадқиқотлар учун 5,5 миллион дирҳам (1,5 миллион АҚШ доллари) ажратди. Мазкур грант уч йилга тақсимланади.
Марказ директори Абдуллоҳ ал-Мандуснинг айтишича, янги ташаббус табиий ёғингарчиликларни тадқиқ қилиш ва уларни янги босқичга олиб чиқиш йўлида муҳим қадам бўлади.
Ўтган йилларда БАА ҳукумати асосий эътиборни булутни “экиш” – булутга турли реагентлар жўнатиш орқали ундаги микрофизик жараёнларни ўзгартириш ва ёғингарчилик миқдорини ошириш технологиясига қаратди.
