АҚШнинг энг бадавлат бизнесменлари рейтинги янгиланди

Forbes USA Tesla бош директори ва SpaceX асосчиси Илон Маскнинг бойлиги 251 млрд доллар деб баҳолади. У тўрт йилдан буён биринчи ўринда келаётган Amazon асосчиси Жефф Безосни ортда қолдирди.

Эндиликда Безос рўйхатда иккинчи ўринда турибди: унинг бойлиги 151 млрд доллар деб баҳоланди.

Microsoft ҳаммуассиси Билл Гейтснинг бойлиги 106 млрд доллар, Oracle ҳаммуассиси Ларри Эллисоннинг бойлиги миқдори 101 млрд доллар деб баҳоланган. Юқори бешталикни Уоррен Баффет якунлайди (97 млрд доллар).

Юқори ўнталикдан Google асосчилари Ларри Пейж ва Сергей Брин, Microsoft собиқ раҳбари Стив Балмер, бизнесмен Майкл Блумберг ва Walmart тармоғи эгаларидан бири Жим Уолтон жой олди.

Koch Industries компанияси эгаси бўлган Дэвид Коҳнинг беваси Жулия Коҳ АҚШнинг энг бадавлат аёли деб топилди. Унинг бойлиги 56 млрд доллар деб баҳоланди.

Коҳдан кейинги ўринда Walmart акциядорларидан бири Элис Уолтон жойлашди (55,7 млрд доллар).

Forbes USA энг бой 20 нафар америкаликнинг умумий бойлигини 1,6 трлн доллар деб баҳолади. Бу ўтган йилдагига нисбатан 235 млрд долларга кам.

Жаҳон рейтингида ҳам Маск биринчи ўринда, Безос эса тўртинчи ўринда: ундан юқорида LVMH эгаси Бернар Арно ва ҳиндистонлик бизнесмен Гаутам Адани турибди.