АҚШ тўлиқ эмланган хорижликларга мамлакатга кириш учун рухсат беришни режалаштирмоқда
АҚШ ҳукумати коронавирусга қарши тўлиқ эмланган хорижлик фуқароларгагина мамлакатга кириш учун рухсат беришни режалаштирмоқда. Бу ҳақда Reuters, The New York Times, CNN ва бошқа оммавий ахборот воситалари президент Жо Байден маъмуриятидаги манбага асосланиб хабар берди.
Янги қоидаларда АҚШга кириш учун COVID-19’га қарши эмланиши шарт бўлмаган кишилар тоифаларининг рўйхати келтирилади. Бу истиснолар нимадан иборатлиги ҳозирча номаълум, аммо улар кўп эмаслиги таъкидланмоқда.
Янги қоидалар эпидемиологик вазият яхшиланганидан кейин кучга киради. Уларни қачон жорий этиш режалаштирилгани номаълум. Июль ойи охирида Оқ уй дельта штаммнинг дунё бўйлаб тарқалиши туфайли АҚШга киришдаги мавжуд чекловлар ҳозирча сақланиб қолишини айтганди.
Ҳозир мамлакатга келган чет эл фуқаролари ҳам, АҚШ фуқаролари ҳам коронавирус тестининг салбий натижасига ёки COVID-19’га қарши эмланганлик сертификатига эга бўлиши лозим. АҚШга қуруқлик чегаралари орқали киришга фақат «зарур сафар» учун рухсат берилади.
Қўшма Штатлар сўнгги икки ҳафта ичида Хитой, Эрон, Ҳиндистон, Бразилия, Жанубий Африка, шунингдек Буюк Британия, Ирландия ва Шенген ҳудудида бўлган чет элликларнинг мамлакатга киришини тақиқлади.
