АҚШ Грузия ҳукуматига «демократияга путур етказганлик» учун санкциялар киритди

Қўшма Штатлар республикадаги «демократияга путур етказишда масъул» бўлган 20 нафар Грузия фуқаросига виза чекловлари жорий қилди, деди Давлат департаменти. Санкциялар ҳукумат вазирлари, парламент аъзолари, ҳуқуқ-тартибот ва хавфсизлик идоралари ходимлари ҳамда алоҳида шахсларга тааллуқлидир. Бироқ, Давлат департаменти «қора рўйхат»га киритилган аниқ номларни айтмади.

“Қўшма Штатлар «Грузия орзуси» партиясининг Грузия фуқароларига, жумладан намойишчилар, оммавий ахборот воситалари вакиллари, ҳуқуқ ҳимоячилари ва мухолифат вакилларига нисбатан шафқатсиз ва асоссиз зўравонликларини давом эттираётганини кескин қоралайди”, — дейилади департамент баёнотида. Шунингдек, «Грузия орзуси» Грузиянинг Евроатлантика келажагидан юз ўгиргани, бу «грузин халқининг мутлақ кўпчилиги орзу қилган ва Грузия Конституциясида кўзда тутилган»лиги қайд этилган.

Бунгача Қўшма Штатлар «Грузия орзуси» билан алоқадор 100 дан ортиқ киши ва уларнинг оила аъзоларига виза чекловларини жорий қилган эди. АҚШ Давлат котиби Энтони Блинкен бир ҳафта олдин оммавий норозилик намойишлари бостирилгани сабабли Грузияга қарши янги санкциялар эълон қилган эди. У «Грузин орзуси»ни фуқароларга нисбатан қатағон, қамоқ ва зўравонликни бас қилишга, митингларда қўлга олинганларнинг ҳаммасини озод қилишга чақирди.

Грузияда норозилик намойишлари октабр ойи охирида «Грузия орзуси» ғалаба қозонган парламент сайловларидан кейин бошланган. Норозилик намойишлари Грузия бош вазири Ираклий Кобахидзенинг 28 ноябрь куни расмийлар Европа Иттифоқига аъзо бўлиш бўйича музокараларни 2028 йил охиригача қолдириши ва Тбилиси Европа молиявий ёрдамидан бош тортаётгани ҳақида эълон қилганидан кейин бўлиб ўтди.

Намойишлар чоғида қаттиқ чоралар қўллаган полиция билан тўқнашувлар юз берди. 4 декабрь куни хавфсизлик кучлари мухолифатдаги «Миллий ҳаракат», «Гирчи – кўпроқ эркинлик», «Дроа» ва «Ахали» партиялари офисларида тинтув ўтказди.