Амитабх Баччан нима учун бунчалик машҳур?

Нима учун машҳур?

Афсонавий ҳинд актёри, сиёсатчи, продюсер ва телебошловчи. У 271 та фильмда суратга тушган. 2000 йилда Ҳиндистон киноижодкорлари миллий ассоциацияси томонидан минг йиллик актёри сифатида тан олинган. У ҳаётлик пайтида мадам Тюссо музейидан мумли ҳайкали ўрин олган дунёдаги кам сонли инсонлардан бири. Франция фуқаролик мукофоти – “Фахрий легион” ордени совриндори.

Қандай машҳур бўлган?   

1942 йилнинг 11 октябрида Ҳиндистоннинг Уттар-Прадеш штати Аллоҳобод шаҳрида дунёга келган. Амитабхнинг отаси Хариванш Рай Баччан маҳоратли шоир, ёзувчи ва таржимон бўлган. Шекспир трагедиялари — “Отелло”, “Макбет”, “Гамлет” ҳамда Умар Хайём, Пушкин, Лермонтов ва Есенин асарларини ҳинд тилига ўгирган. Харишваншга “Баччан” (болакай) деб унинг онаси лақаб қўйган. У эса бу лақабни тахаллусига айлантирган.

Болалигидан актёр бўлишни орзу қилган Амитабх кинода ўзини синаб кўрмоқчи бўлади. Деҳли Университетини тугатгач, Уттар-Прадешдан Бомбейга йўл олади. Аммо бу саъй-ҳаракатлари самарасиз бўлади. У киночиларнинг ўша пайтдаги талабига тўғри келмас, икки метрли бўйи ва қорачадан келгани режиссёрларга ёқмасди. Фақат унинг овозидан экран ортида ҳикоя қилиш ва иккинчи даражали шарҳлашда фойдаланишади. Лекин Амитабх ҳаракатни асло сусайтирмайди. Баччанга биринчи бор Saat Hindustani компаниясида омад кулиб боқади. У Болливуддаги ролини ўша пайтдаги бош вазир Индира Ганди хонимнинг тавсияномасига кўра қўлга киритади, Амитабх унинг ўғли Ражив Ганди билан дўст эди.1969 йил суратга олинган “Етти ҳинду” фильми тижорий томондан муваффақият қозонмаса-да, Баччан энг яхши янги актёр миллий киномукофотига сазовор бўлган.“Муҳаббат ҳеч қачон ўлмайди” фильмидаги ижросидан сўнг Баччанга “Filmfare” журналининг энг яхши иккинчи даражали актёр мукофоти топширилган. 1973 йили у “Чўзилган қасос” фильмида ёвузликка қарши мустақил курашга киришган полициячи Вижай Кханна ролини ижро этган. Унинг қадди расолиги, ўткир нигоҳи бу ролга ниҳоятда мос келган.Амитабх мелодрама, комедия ва ижтимоий драмаларда ҳам турли образларни маромига етказиб ижро этган.У келишган, вазмин ва олижаноб Жай образини ажойиб тарзда ижро этган“Қасос ва қонун” блокбастери эса унга чинакам омад келтириб, у Болливуднинг энг яхши актёри статусини мустаҳкамлаб олган. Баччаннинг йўғон овози ҳам ҳамиша эътиборда бўлган. Машҳур режиссёр Сатьяжит Рей унинг овозидан ўзининг “Шахматчилар” фильмида фойдаланган. Шу тарзда Баччан экраннинг шаксиз қиролига айланган, унинг кинода Рекха билан дуэти Болливуддаги энг яхши жуфтлик сифатида баҳоланган.

1982 йили “Ҳаммол” фильмини суратга олиш чоғида эса Баччан трюклардан бирини бажараётиб оғир шикастлангач,бир неча ҳафта шифохонада ҳушсиз ётади.Соғайгач “Ҳаммол”даги ижросини давом эттиради.1984 йили актёр парламентга номзодини қўйиб, ғалаба қозонади. Бироқ сиёсат бобида ишлари унчалик ўнгланмайди. Унинг кинога қайтиши ҳам муваффақиятсиз кечади. Сабаби экранни Риши Капур, Митхун Чакраборти, Шохруҳхон каби юлдузлар эгаллаганди. Амитабх укаси Ажитабх билан ABCL (Amitabh Bachchan Corporation Ltd) компанияси (фильмлар ишлаб чиқарувчи йирик корхона)ни очади. Аммо 1999 йилги бир қатор омадсизлар, компаниянинг қарзга ботиши актёрнинг салкам хонавайрон бўлишга олиб келади. Бош миллий банк Баччанга нисбатан даъво иши қўзғатади. Баччан “Ким миллионер бўлишни истайди?” телекўрсатувида бошловчилик қилиб ўзини тиклаб олган. Унинг иштирокидаги “Вир ва Зара”, “Боғбон”, “Зулмат” фильмлари эса яна катта муваффақият қозонган. “Зулмат”  йилнинг энг яхши фильмлари халқаро рейтингига киритилган.

Актёрнинг турмуш ўртоғи ҳинд актрисаси Жайя Бхадури. Жуфтлик Ҳиндистоннинг энг бахтли оиласи, дея эътироф этилган. Уларнинг икки фарзанди бор. Оила аъзолари Баччанга Мунна деб мурожаат қилишади.Амитабх Баччан пулдан ҳам кўра вақтни кўпроқ қадрлайди, хоббиси – достон ёзиш. У чап қўлида ҳам аниқ ва равшан ёза олади.

Машҳур нима дейди?

“Етишмовчиликлар мақсадга эришиш йўлида сизни тўхтатишига йўл қўйманг”.

“Ҳаётда янги бир нарсани синашдан қўрқмаслик керак. Баъзан у шунга арзирлик бўлади”.

“Менинг диндор бўлишим ажабланарли эмас, чунки фақат дин сизга кўп саволларга жавоб беради ва мўъжизага ишонишингизга имкон беради”.