Алексей Навальнийга “Жасорат" мукофоти топширилди

8 июнь куни айни вақтда қамоқда жазо муддатини ўтаётган 45 ёшли сиёсатчи Алексей Навальний Инсон ҳуқуқлари ва демократия бўйича Женева форумида “Жасорат мукофоти” билан тақдирланди. Мукофотни Алексейнинг номидан унинг 19 ёшли қизи Даря Навальная қабул қилиб олган.

Даря Навальная тақдирлаш маросимидан кейин оммага видеомурожаат билан чиқди.

“Отам ушбу мукофотни олишини билганида ва мени унинг номидан мукофотни қабул қилишга чақирганларида қамоқхонадан туриб мактуб ёзди: “Даша, сенга иккита муҳим нарсани айтишим керак. Биринчи ва энг муҳими, илтимос, биринчи чиқишингни расво қилма. Иккинчиси, мен бу мукофотни олишдан беҳад ғурурланишимни айтишни ҳам унутма”.

Бу менинг отам ва уни қўллаб-қувватлаётганларнинг барчаси учун катта шараф. Мен буларни мағрур қиз ва демократия бузилишидан ташвишга тушган Россия фуқароси сифатида айтяпман. Мен Даря Навальная, Путиннинг асосий сиёсий рақибларидан бири бўлган, бутун умрини коррупция билан курашиш, одамларнинг ҳуқуқ ва эркинлиги, норозилик билдириш ва сайловларда қатнашиш ҳуқуқини ҳимоя қилиш учун сарф этган Алексей Навальнийнинг қизиман”, деди сиёсатчининг қизи.

Эслатиб ўтамиз, Навальний 2021 йилнинг февраль ойи бошида “Ив Роше” иши бўйича 3,5 йилга озодликдан маҳрум этилган эди.