Аҳмадбой одамларда унга нисбатан ишонч қандай пайдо бўлганини сўзлаб берди

Жиноят ишлари бўйича Қуйи Чирчиқ туман суди биносида 12 февраль, чоршанба куни, чинозлик Аҳмадбой ва унинг шерикларига нисбатан тўртинчи очиқ суд иши ҳукми эълон қилинди.

«Дарё» мухбири Миролим Исажоновнинг хабар беришича, Аҳмаджон Турсунбоев суд жараёнида тушлик учун ажратилган вақт ичида журналист ва блогерларни қизиқирган турли саволларга ойдинлик киритди.

ОАВ вакилларининг «Молиявий пирамида бутун дунёда мавжуд. Сиз ғояни кимдан олгансиз?», деган саволига Аҳмадбой шундай жавоб берди:

«Менга ҳеч ким ўргатмаган. Бировлар буни пирамида, деяпти. Энди битта нарсани ўйланг, сиз агар бирон бир ташкилот очиб, ишни вақтида ва жой-жойида олиб борсангиз, фуқаролар сизга ишонади. Агар бошидан бировни алдасангиз, сизга ҳеч ким ишонмайди. Одамларда менга нисбатан ана шу ишонч бўлган — вақтида пулларини тўлаганман. Шу боис улар маблағлари, машиналарини олиб келишни бошлаган,» — деди Аҳмадбой.

Судланувчи қисқа интервью давомида ўзининг энг катта хатосига ҳам тўхталиб ўтди.

«Мен, аввало, Худога ишонганман ва таваккал қилиб иш бошлаганман. Ортимда қўллаб-қувватлайдиган танишим бўлмаган. Ўшанда фуқаролар келиб, ‘Аҳмад ака, бу ишингизга ким кафил?’, деб кўп сўрарди. Мен Аллоҳга таваккал қилиб ишлаган боламан.

Менинг энг катта хатойим — фуқаролар ҳаддан ташқари кўпайиб кетганида. Бу ишга вақтида нуқта қўйишим керак эди. Тўхтатиш учун 2009—2010 йилларда ёпишим лозим эди.

Қўл остимдагиларнинг ҳаммаси ҳалол ишлаган ва мени сотмаган. Чунки ўзимнинг жиянларим, яқинларим бирга ишлаган ва маошларини вақтида олган.

Одамларнинг ҳаддан ташқари кўпайиб кетиши натижасида жиноят иши очилган. Деди-деди гаплар ҳам жуда болалаб кетди. Кўплар кўчада менинг номимни сотиб, иш қилиб юборган. Филиал очган болалар бор. Уларга менинг умуман алоқам йўқ», — деди Аҳмадбой.

Аҳмаджон Турсунбоев журналистларнинг «Устингиздан ариза тушмаган бўлса, жиноят иши очилишидан норози эмасмисиз?», деган саволини қуйидагича изоҳлади: «Энди ўша пайтда ишим тўғри келмагандир. Балки, нақд айланма пул қилганим учундир. Нақд пул айланмаси бўлгани боис, фуқаролар ҳам кўпайиб кетган. Шунинг ҳисобига балки фирмам ёпилгандир».

Manba: daryo. uz