1 май куни Туркияда катта норозилик намойиши бўлиб ўтди

Туркиянинг кўплаб шаҳарларида 1 май – Меҳнат ва бирдамлик куни муносабати билан пиёда юришлар бўлиб ўтди ва бу катта норозилик намойишига айланди. Энг катта воқеалар Истанбулда бўлиб ўтди. Мегаполиснинг турли жойларида кўплаб одамларга қарши куч ишлатилди. Жами 226 киши ҳибсга олинган. Бу ҳақда Казинформ хабар берди.

Истанбул ҳукумати фуқароларга Таксим майдонида 1 май байрамини нишонлашни тақиқлаганидан сўнг намойишчилар хавфсизлик кучлари билан тўқнашди.

Вилоят ҳокими байрамни майдонда нишонлашни тақиқлаган бўлса-да, касаба уюшмалари ва сиёсий партиялар вакиллари парадни ўтказишга қарор қилишди. Улар марказий майдонга яқинлашганда, полиция кўздан ёш оқизувчи газ ва бошқа махсус воситалардан фойдалана бошлади.

Истанбул марказидаги Таксим майдони касаба уюшмалари ва мухолифат учун рамзий аҳамиятга эга. Фаоллар у ерда 1977 йил 1 май воқеасини хотирлаш учун митинг ўтказмоқчи эди. Ўша йили бу майдонда кўплаб намойишчилар отиб ташланган. Ушбу тадбирда 500 мингга яқин киши иштирок этган. Турли манбаларга кўра, отишма натижасида 40 дан ортиқ одам ҳалок бўлган, 220 дан ортиқ киши жароҳатланган.

Майдон ҳам мухолифат сўзлаш жойига айланган. 2013 йилда ҳукуматнинг худди шу номдаги майдон яқинида жойлашган Таксим-Гези боғини қуришига қарши намойишлар шу ерда бошланган. Улар ортидан Туркиянинг ўша пайтдаги бош вазири ва амалдаги президенти Режеп Тайип Эрдоғанга қарши бутун мамлакат бўйлаб намойишлар бўлиб ўтди. Намойишлар бостирилганидан кейин Туркия ҳукумати минтақада ҳукуматга қарши йиғинлар ўтказишни тақиқлади.

Кеча – 1 май куни полиция Истиқлол шоҳ кўчаси бўйлаб Таксим майдонига ўтишга уринган турли гуруҳларнинг юришига тўсқинлик қилди. Қўлларида баннер ва плакатлар кўтарган фуқаролар тўсиб қўйилди. 20 дан ортиқ киши ҳибсга олинган.

Бешикташ туманидан Таксим майдонига юришга ҳаракат қилган одамларнинг юришига ҳуқуқ ҳимоячилари ҳам аралашди. Шиорлар айтган бир гуруҳ фуқаролар қўлга олинди.

Бундан ташқари, турли сиёсий партиялар ва ёшлар ҳаракатига мансуб бир гуруҳ одамлар кўтарилган баннерлар билан Таксимга пиёда етиб боришга ҳаракат қилган. Полиция уларни Шишли ҳудудида тўхтатди. Ҳукуматга қарши шиорлар айтган фуқаролар ҳибсга олинди. Парад муштлашувга айланди. Полиция намойишчиларни тинчлантириш учун куч ишлатишга мажбур бўлди.

Куртулуш туманида полиция ходимлари Таксим майдонига юришни хоҳлаганларнинг олдини олди. Ички ишлар вазирлигининг махсус бўлинмалари 10 дан ортиқ кишини қўлга олди. Улар полиция бўлимларига олиб кетилган.

Полиция Долапдере ҳудудидан катта бир гуруҳ фуқароларнинг Таксимга юришига тўсқнлик қилди. Огоҳлантиришларга қарамай, қаршилик кўрсатган 5 киши қўлга олинди.

Шунингдек, профессор Жемиль Ташжиоглу номидаги шаҳар касалхонаси биноси ёнида турли касаба уюшмалари вакиллари тўплана бошлади. Улар Таксим майдонига ҳам юришни режалаштирган. Полиция оломонни тарқатиб юборди ва энг фаол фуқароларни ҳибсга олди.

Туркия Ички ишлар вазири Али Йерликаянинг баёнотига кўра, рухсат этилмаган намойиш ва митингларнинг тўхтатилиши натижасида жами 226 киши қўлга олинган. Шу билан бирга, 28 нафар ҳуқуқ-тартибот ходими енгил тан жароҳати олган.