YPX xodimi "Tez yordam"ni nega to‘xtatdi? Bu yerda kim haq? (video)

Ijtimoiy tarmoqlarda Ichki ishlar vazirligi Yo‘l harakati xavfsizligi bosh boshqarmasi faoliyatiga oid navbatdagi video tarqaldi. Ikki kundirki, mazkur video muhokama maydonining asosiy mavzusi bo‘lib turibdi. Bu haqda Qalampir nashri ma’lum qildi.

Tasvirlardan ko‘rish mumkinki, YPX xodimi Sog‘liqni saqlash vazirligi Tez tibbiy yordami tizimining DAMAS rusumidagi avtomobilini to‘xtatadi. Ushbu voqea Surxondaryoning Sherobod shahrida bo‘lgani aytilmoqda.

Avtomobilni boshqarib ketayotgan haydovchi YPX xodimiga mashinada betob odam borligi, uni zudlik bilan shifoxonaga yetkazishi kerakligini aytsa ham YPX xodimi uning so‘zlariga quloq tutishni istamaydi. Aksincha, undan chaqiruvga yuborilganini tasdiqlovchi hujjatni so‘raydi. Haydovchi esa hujjatlarni ko‘rsatishdan bosh tortmaydi va yana avtomobilda betob odam borligini aytishga urinadi.

Shu vaqt YPX xodimi avtomobilga yaqinlashib, haydovchining o‘rindig‘ini egallaydi va mashinani o‘t oldirib, ravona bo‘ladi. Taxminimizcha, YPX xodimi avtomobilni jarima maydonchasi tomonga haydab ketadi. Old o‘rindiqda o‘tirgan hamshiraning ma’lum qilishicha, YPX xodimi haydovchini migalka ni yoqib harakatlanmaslikda ayblayotganini aytadi.

Mazkur video haydovchi emas, balki voqeaga guvoh bo‘lgan odamlar tomonidan suratga olingan. Unda 20 kishidan ortiq kuzatuvchilar YPX xodimini insofga chaqirishga, avtomobilning ortidagi betob kishining hayotini xavf ostida qo‘ymaslikka undaydilar. Biroq, haydovchi orqa o‘rindiqqa o‘tirish uchun avtomobilning eshigini ochganda, o‘rindiqda hech qanday bemor yo‘qligi tasvirlangan. Xo‘sh, u iddao qilgan og‘ir ahvoldagi bemor qayerda? Bu o‘rinda kim haq: haydovchi yo YPX xodimi?

Ijtimoiy tarmoqlarda bunga o‘xshash videolar juda ko‘p tarqalmoqda. Bir vaqtlar faoliyatiga oid hech bir holatni ko‘zdan qochirmayotgan va har bir voqelikka bayonot berib chiqayotgan IIV so‘nggi vaqtlarda bunday videoisbotlarni bee’tibor qoldirmoqda.