Xorazmda viloyat Mudofaa ishlari boshqarmasi binosi foydalanishga topshirildi

Kecha, 12 fevral kuni Urganch shahrida joylashgan va kapital ta’mirdan chiqarilgan Xorazm viloyati Mudofaa ishlari boshqarmasi binosi foydalinishga topshirildi. Bu haqda Shimoli-g‘arbiy harbiy okrug matbuot xizmati xabar bermoqda.

Binoning ochilish marosimida Xorazm viloyati hokimi – harbiy-ma’muriy sektor rahbari Farhod Ermanov, Shimoli-g‘arbiy harbiy okrug qo‘shinlari qo‘mondoni polkovnik Dilshod Choriyev, davlat va jamoat tashkilotlari vakillari hamda yoshlar ishtirok etdi.

“Nasib bo‘lsa bu yilda viloyatimizda joylashgan Urganch, Xiva shaharlari va Xonqa tumanidagi mudofaa ishlari bo‘limlari hamda kelajakda boshqa tumanlardagi bu kabi ijtimoiy-ma’muriy ob’ektlarning infratuzilmasini yaxshilash va ta’mirlashni davom ettiramiz. 2020 yilda Shimoli-g‘arbiy harbiy okrug bilan viloyat harbiy-ma’muriy sektor tomonidan qilinadigan juda ko‘p ishlar turibdi. Ularni ham, albatta, belgilangan muddatlarda amalga oshiramiz”, – dedi Farhod Ermanov.

Shimoli-g‘arbiy harbiy okrug qo‘shinlari qo‘mondoni Dilshod Choriyev tabrik so‘zida “Viloyat hokimligi tomonidan yaratilgan mana shunday ko‘rkam sharoitlar Xorazm xalqi uchun xizmat qilib, viloyatning o‘smirlarini o‘z yigitlik burchini o‘tashiga va kelajakda vatanparvar insonlarni tayyorlash uchun xizmat qiladi. Bugun Prezidentimiz tashabbusi bilan deyarli barcha harbiy qismlarimiz kapital ta’mirdan chiqarilib, eng zamonaviy uskunalar bilan jihozlandi. Harbiy qismlarga kirsalaringiz, baxru dillaringiz yayrab, qalbingizda xotirjamlik va kelajakka bo‘lgan yuksak ishonch hissi jo‘sh uradi”, deya ta’kidlab o‘tdi.

Ta’kidlash joizki, uch qavatdan iborat bo‘lgan viloyat Mudofaa ishlari boshqarmasi 1981 yilda qurib foydalanishga topshirilgan bo‘lib, shu davr mobaynida birinchi marta kapital ta’mirlandi. Oldinlari  boshqarma xodimlari to‘la sharoitga ega bo‘lmagan xonalarda xizmatni olib borishgan. Bugun sohaga qaratilayotgan e’tibor sabab, ular uchun barcha zarur imkoniyatlar yaratilmoqda.

Tadbirda binoni bugungi kun talablari asosida ta’mirlashda jonbozlik ko‘rsatgan quruvchi tashkilotga minnatdorlik izhor etilib, sovg‘alar ulashildi.

Aytish joizki, o‘g‘il-qizlarni yurtga sadoqat ruhida tarbiyalashda yoshi kattalar, nuroniylar ko‘magiga, tajribasiga tayanish maqsadida “Nuroniy” jamg‘armasi Mudofaa vazirligi tizimiga kiritildi. Bundan buyon ular ham ish faoliyatini Mudofaa ishlari boshqarma va bo‘limlarida olib borishadi. Jamg‘arma raisi endilikda viloyat mudofaa ishlari boshqarmasi boshlig‘ining o‘rinbosariga tenglashtirildi. Tantana munosabati bilan viloyat “Nuroniy” jamg‘armasi raisi Matkarim Jumaniyazovga kapital ta’mirdan chiqarilgan binoda mudofaa vaziri tashabbusi bilan ikkita xizmat xonasi ajratildi.

Binoda safarbarlik o‘quvlarini o‘tkazish uchun alohida sharoitlar qilingan. Sport zali, oshxona, xizmat xonalari zamonaviy milliy dizayn asosida ta’mirlanib, jihozlandi.

Yana bir e’tiborli jihat – boshqarma binosining birinchi qavatida joylashgan kutubxonada muzey tashkil etilgan bo‘lib, u yerdan Ikkinchi jahon urushida frontda va front ortida jonbozlik ko‘rsatgan yurtdoshlarimiz hamda ularning qahramonligi aks etgan adabiyotlar, xorazmlik qahramonlar haqida ma’lumotlar, faxriylar va ularning oila a’zolari tomonidan muzey fondi uchun berilgan orden va medallar, o‘sha yillarda foydalanilgan qurol va harbiy aslahalar, boshqarma hayoti va tarixi aks etgan eksponatlar o‘rin olgan.