Suriyalik Rayyon 20 oydan so‘ng yana yura boshladi
Sakkiz yashar Rayyon Qosim 2016 yilning 25 noyabrida Halabdagi uylarning hovlisida o‘ynayotgan edi. Qo‘qqisdan bomba portlashi oqibatida u chap qo‘lidan ayrildi va yura olmay qoldi.
“O‘sha kuni oilam uyda edi. Men esa juma namozi uchun tahorat olayotgandim. Bolalar tashqarida o‘ynayotgandi. Samolyotning ovozi eshitildi, keyin bomba uyimizning ustiga tushdi”, – deydi qizaloqning otasi Shahar Qosim “Anadolu” agentligi muxbiri bilan suhbatda.
Uning aytishicha, tashqariga chiqqanida chang-to‘zon orasida taxminan 16 kishining o‘lik yoki yarador ekanini ko‘rgan.
“Ikki qizimdan biri yaralangandi, o‘g‘lim ham. Og‘ir yaralangan qizim Nur 4 yashar edi, o‘sha yerdayoq halok bo‘ldi. Uyimizga mehmon bo‘lib kelgan rafiqamning singlisi va uning bolalari ham halok bo‘ldi. Ikki qizim va o‘g‘limni mashinaga o‘tqazdim. U yerdan uzoqlashayotganimizda samolyot yana bomba tashladi. Kasalxonaga yetib bordim. O‘g‘limni va Rayyonni operasiya qilishdi”, – deydi ota.
Oilasi Rayyonni avval Turkiyaning Mersin shahridagi, keyin Anqaradagi kasalxonaga olib keldi. Qizaloqqa protez qo‘l taqildi. Uzoq davom etgan muolajalardan keyin u yana yura boshladi.
Manba: azon.uz