Суриялик Райён 20 ойдан сўнг яна юра бошлади

Саккиз яшар Райён Қосим 2016 йилнинг 25 ноябрида Ҳалабдаги уйларнинг ҳовлисида ўйнаётган эди. Қўққисдан бомба портлаши оқибатида у чап қўлидан айрилди ва юра олмай қолди.

“Ўша куни оилам уйда эди. Мен эса жума намози учун таҳорат олаётгандим. Болалар ташқарида ўйнаётганди. Самолётнинг овози эшитилди, кейин бомба уйимизнинг устига тушди”, – дейди қизалоқнинг отаси Шаҳар Қосим “Анадолу” агентлиги мухбири билан суҳбатда.

Унинг айтишича, ташқарига чиққанида чанг-тўзон орасида тахминан 16 кишининг ўлик ёки ярадор эканини кўрган.

“Икки қизимдан бири яраланганди, ўғлим ҳам. Оғир яраланган қизим Нур 4 яшар эди, ўша ердаёқ ҳалок бўлди. Уйимизга меҳмон бўлиб келган рафиқамнинг синглиси ва унинг болалари ҳам ҳалок бўлди. Икки қизим ва ўғлимни машинага ўтқаздим. У ердан узоқлашаётганимизда самолёт яна бомба ташлади. Касалхонага етиб бордим. Ўғлимни ва Райённи операция қилишди”, – дейди ота.

Оиласи Райённи аввал Туркиянинг Мерсин шаҳридаги, кейин Анқарадаги касалхонага олиб келди. Қизалоққа протез қўл тақилди. Узоқ давом этган муолажалардан кейин у яна юра бошлади.

Manba: azon.uz