“SCIENCE AND INNOVATION AWARDS 2025”: yilning eng yaxshilari taqdirlandi

Mamlakatimiz ilm-fan hayotidagi eng muhim, eng nufuzli tadbirlardan biri — “SCIENCE AND INNOVATION AWARDS 2025” mukofotlash marosimi an’anaviy tarzda o‘tkazib kelinmoqda. Ushbu ulkan ilmiy bayram “SCIENCE AND INNOVATION” xalqaro ilmiy jurnali jamoasi tashabbusi bilan tashkil etilib, yil davomida ilm-fan va innovasiyalar rivojiga munosib hissa qo‘shgan eng ilg‘or olimlar va tashkilotlarni e’tirof etishga qaratilgan.

2025-yil 20-dekabr kuni Toshkent shahridagi “Turkiston” san’at saroyida mazkur nufuzli tadbir to‘rtinchi marotaba yuqori saviyada tashkil etildi. Tantanali marosimni “Science and Innovation” kompaniyasi bosh direktori Rustamov Baxtiyor Normamatovich ochib berib, o‘z nutqida ilm-fan taraqqiyotining bugungi jamiyatdagi o‘rni, ta’lim tizimida innovasion yondashuvlarning ahamiyati hamda olimlarni qo‘llab-quvvatlash masalalariga alohida to‘xtalib o‘tdi.

“Science and Innovation Awards 2025” tadbiri Apex Insurance kompaniyasining bosh homiyligida tashkil etildi. Homiy — “Bazalt Uzbekistan”. Apex Insurance kompaniyasining raisi Yunusov Jahongir Jamalidinovich o‘z nutqida ilm-fan vakillarini qo‘llab-quvvatlashdan doimo mamnun ekanligini ta’kidlab o‘tdi.

Qadim-qadimdan O‘zbekiston zamini ilm-fan va ma’rifat beshigi sifatida e’tirof etib kelinadi. Bu muqaddas diyorda yetishib chiqqan buyuk allomalar jahon sivilizasiyasi rivojiga beqiyos hissa qo‘shgan. Bugungi kunda ham ana shu ulug‘ ilmiy merosga tayanagan holda mamlakatimiz olimlari zamonaviy izlanishlar olib borib, fan sohalarida yangi yutuqlarni qo‘lga kiritmoqda va xalqaro ilm-fan maydonida munosib o‘rin egallab bormoqda.

Aynan shu yuksak ruh va e’tirof ramzi sifatida “SCIENCE AND INNOVATION AWARDS 2025” marosimida o‘zbek ilm-fanining eng nufuzli vakillari bir maskanga jam bo‘ldi.

Taqdirlangan nominasiyalar

Tadbir davomida quyidagi 10 ta nufuzli nominasiya bo‘yicha g‘oliblar aniqlanib, tantanali ravishda taqdirlandi:

1. YIL OLIMI
   — Ashurov Ravshan Radjabovich
   — Agzamxodjayeva Saida Sabitxanovna
   — Pulatova Jamila Shagayratovna

   2. YILNING ENG YAXSHI OLIY TA’LIM MUASSASASI
   — Toshkent shahridagi Turin politexnika universiteti

   3. YILNING ENG YAXSHI NODAVLAT OLIY TA’LIM MUASSASASI
   — Central Asian University

   4. YILNING ENG YAXSHI ILMIY TADQIQOT INSTITUTI
   — Avtomobil yo‘llari ilmiy tadqiqot instituti

   5. YILNING ENG INNOVASION UNIVERSITETI
   — Samarqand xalqaro texnologiyalari universiteti

   6. YILNING ENG YAXSHI ILMIY NASHRI
   — Nilufar Abdurahmonova
   “Kompyuter leksikografiyasi”

   7. ILM-FAN SOHASIDAGI XIZMATLARI UCHUN
   — Akademik Djurayev Risbay Xaydarovich

   8. YILNING ENG YAXSHI TADQIQOT MARKAZI
   — Raqobat siyosati va iste’molchilar huquqlarini himoya qilish ilmiy tadqiqot instituti

   9. ILM-FAN HOMIYSI
   — “APEX Insurance” kompaniyasi

Tanlov doirasida respublika bo‘ylab 3000 dan ortiq ariza kelib tushdi. Dastlabki saralash bosqichida har bir nominasiya bo‘yicha 10 nafardan finalist aniqlanib, ular bilan alohida suhbat va chuqurlashtirilgan tahlil bosqichlari tashkil etildi.

Saralash jarayoni ikki bosqichda amalga oshirilib, komissiya a’zolari tomonidan nomzodlarning ilmiy salohiyati, kasbiy faoliyati, amaliy natijalari va tanlov mezonlariga muvofiqligi atroflicha baholandi. Yakuniy natijalarga ko‘ra, eng munosib deb topilgan ishtirokchilar g‘oliblikni qo‘lga kiritib, maxsus statuetkalar, diplomlar va esdalik sovg‘alari bilan taqdirlandilar.

Nufuzli mehmonlar va dastur

“Science and Innovation Awards 2025” tadbirida O‘zbekiston Fanlar akademiyasi vakillari, vazirlik va idoralar mas’ullari, oliy ta’lim muassasalari rektorlari, ilmiy-tadqiqot institutlari rahbarlari, akademiklar, professor-olimlar, ommaviy axborot vositalari vakillari hamda ilm-fan jamoatchiligi faol ishtirok etdi.

Tadbir dasturidan, shuningdek:

• “O‘zbekistonning taniqli olimlari – 2025” ensiklopediyasi taqdimoti;

• “Mening muvaffaqiyat yo‘lim” biografik ensiklopediyasi – 2025 taqdimoti;

• ilm-fan va ta’lim muassasalari ko‘rgazmalari;

• konsert dasturi, kofe-breyk va fotosessiyalar o‘rin oldi.

Tashkilotchi haqida

“Science and Innovation” kompaniyasi 2025-yil davomida oliy ta’lim muassasalari va ilmiy-tadqiqot institutlari bilan hamkorlikda 100 dan ortiq xalqaro va respublika miqyosidagi ilmiy-amaliy konferensiya va simpoziumlarni tashkil etdi. Ushbu tadbirlarda mahalliy va xorijiy yetakchi olimlar ishtirok etib, konferensiyalarning ilmiy-amaliy ahamiyatini yanada oshirdi.

Yil davomida 10 000 dan ortiq ilmiy maqolalar taqrizdan o‘tkazilib, har biriga DOI raqami biriktirildi va nufuzli xalqaro ilmiy bazalarda indekslandi. Natijada 20 000 dan ortiq mualliflarning h-indeksi oshishiga erishildi.

Bu ko‘rsatkich o‘zbek ilm-fani tarixida rekord natija sifatida e’tirof etilmoqda.

Kompaniyaning yirik loyihalaridan biri — “O‘zbekistonning taniqli olimlari ensiklopediyasi” bo‘lib, loyiha doirasida taniqliolimlar.uz platformasi yaratildi hamda olimlar uchun Wikipedia sahifalari ochildi.

Shuningdek, 2025-yilda “Science and Innovation” xalqaro ilmiy jurnali Rossiyaning RINS ilmiy bazasi bilan hamkorlikni yo‘lga qo‘yib, maqolalar ushbu nufuzli platformada indekslana boshlandi.

Xulosa

O‘zbekiston Respublikasi Prezidenti Shavkat Mirziyoyev ta’kidlaganidek: “Hozirgi zamonda ilm, bilim va salohiyat suv bilan havoday zarur.”

Aynan shu g‘oya asosida tashkil etilgan “Science and Innovation Awards 2025” tadbiri fidoyi va jonkuyar olimlarimizni e’tirof etish, ilmiy izlanishlarni qo‘llab-quvvatlash hamda kelajak avlod uchun mustahkam ilmiy poydevor yaratishga xizmat qildi.

Tadbir doirasida bildirilgan e’tirof va rag‘batlar kelgusi yilda amalga oshiriladigan ilmiy tadqiqotlar uchun kuchli motivasiya va ilhom manbai bo‘lishi shubhasiz.