Pelosi Ozarbayjonning Armaniston suvereniteti va chegaralariga hujumni qoraladi

AQSh Kongressi Vakillar palatasi spikeri Nensi Pelosi yakshanba kuni Yerevanda Ozarbayjonning Armaniston suveren hududi va chegaralariga qilgan hujumlarini keskin qoralashini aytdi.

Pelosi Armaniston parlamenti spikeri Alen Simonyan bilan uchrashuvda aytgan bu bayonotidan mahalliy ommaviy axborot vositalari iqtibos keltirmoqda.

Spiker, shuningdek, Armanistonning suvereniteti va hududiy yaxlitligi AQSh uchun muhim ekanini ta’kidladi. Uning aniqlik kiritishicha, Ozarbayjonning Tog‘li Qorabog‘dagi tinch aholi va tarixiy obidalarga qarshi vandalizm harakatlari Qo‘shma Shtatlarning diqqat markazida bo‘lib turibdi.

“Biz Armaniston rahbariyati bilan nima qilishimiz mumkinligi haqida gaplashib olish uchun keldik”, dedi Vakillar palatasi spikeri.

Shanba kuni Armanistonga yetib kelgan Nensi Pelosi 19 sentyabrgacha bu yerda qolishi kutilmoqda.