JSST pandemiyaga qarshi kurash bo‘yicha kelishuvni tasdiqladi

COVID-19 pandemiyasi davrida boshlangan uch yillik muzokaralardan so‘ng pandemiyaga qarshi kurash bo‘yicha bitimni ma’qullash to‘g‘risidagi rezolyusiyani qabul qilish to‘g‘risida qaror qabul qilindi.

Jahon sog‘liqni saqlash tashkiloti ma’lumotlariga ko‘ra, ushbu tarixiy kelishuv tashkilot Nizomining 19-moddasi asosida qabul qilingan.

Uning maqsadi pandemiyalarning oldini olish va kelgusida bunday inqirozlarga samaraliroq javob berish uchun davlatlar, xalqaro tashkilotlar (jumladan, JSST), fuqarolik jamiyati, xususiy sektor va boshqa manfaatdor tomonlar o‘rtasidagi hamkorlik va o‘zaro sa’y-harakatni mustahkamlashdan iborat.

— Shu tariqa, butun dunyo hukumatlari adolat tamoyilini mustahkamlash, salomatlikni yaxshilash, o‘z mamlakatlari va o‘zaro bog‘langan jahon hamjamiyatini pandemiya potensiali bo‘lgan patogenlar va viruslar keltirib chiqaradigan tahdidlardan himoya qilishga hissa qo‘shmoqda. Men tashkilotga a’zo davlatlarga COVID-19 pandemiyasining saboqlarini inobatga olgani va insoniyatni kelajakdagi pandemiyalardan yaxshiroq himoya qilish uchun birgalikda harakat qilishga qaror qilgani uchun minnatdorman, — dedi JSST Bosh direktori doktor Tedros Adxanom Gebreyesus.

Qarorda pandemiyaga qarshi kurash bo‘yicha kelishuvni amalga oshirishga tayyorgarlik ko‘rish yuzasidan bir qator keyingi qadamlar belgilangan. Ushbu Bitimga ilova sifatida ajratilgan hukumatlararo qo‘shma ishchi guruhi orqali patogen mikroorganizmlarga kirish va ular uchun imtiyozlarni taqsimlashni ta’minlash tizimini ishlab chiqish va kelishish jarayonini tashkil etish shular jumlasidandir. Bu jarayonning natijalari kelgusi yil Jahon sog‘liqni saqlash assambleyasida ko‘rib chiqiladi. Bitim 60 ta davlat ratifikasiya qilganidan keyin kuchga kiradi.

Bundan tashqari, davlatlar hukumatlararo qo‘shma ishchi guruhiga pandemiyaning oldini olish, tayyorgarlik ko‘rish va javob choralarini moliyalashtirishni muvofiqlashtirish mexanizmini, shuningdek, Global ta’minot va logistika tarmog‘ini yaratish bo‘yicha tayyorgarlik ishlarini boshlashni topshirdi. Ushbu tarmoq favqulodda vaziyatlar, shu jumladan pandemiya davrida muhtoj bo‘lgan mamlakatlarga xavfsiz va arzon pandemiyaga qarshi tibbiy vositalardan adolatli, tez va samarali foydalanishni kengaytirish, osonlashtirish va ta’minlash va bunga to‘sqinlik qiladigan to‘siqlarni bartaraf etishga qaratilgan.

BBC xabariga ko‘ra, Bitim hozirda Jenevada bo‘lib o‘tayotgan Jahon sog‘liqni saqlash assambleyasining 78-sessiyasida ma’qullangan.