Jonsonning so‘zlariga ko‘ra, Putin Ukrainaga bostirib kirishi oldidan unga ham raketalar hujumi bilan tahdid qilgan
Buyuk Britaniyaning sobiq bosh vaziri Boris Jonsonning ma’lum qilishicha, Ukrainaga bostirib kirish arafasida Vladimir Putin u bilan telefon orqali muloqot qilgan va raketa hujumi bilan tahdid qilgan.
Jonsonning so‘zlariga ko‘ra, 2022 yil fevral oyida bo‘lib o‘tgan suhbat juda uzoq va g‘ayrioddiy kechgan.
«Bir payt u menga qandaydir tahdid qildi va dedi: "Boris, men sizni xafa qilishni xohlamayman, lekin raketa yoki shunga o‘xshash nimadir bilan buning uchun bir daqiqa kerak bo‘ladi, xolos"», — deya Putinning so‘zlaridan iqtibos keltiradi Jonson.
Qayd etilishicha, bu tahdid Ukrainadagi urush halokatli bo‘lishi, G‘arb sanksiyalari va Rossiya chegaralari yaqinida NATO kuchlarining ko‘payishiga olib kelishi haqidagi ogohlantirishdan keyin qilingan.
