Hindiston S-400 ning yangi partiyasini olishni rejalashtirmoqda

Hindiston 2023 yil boshida S-400 ning yangi partiyasini olishni rejalashtirmoqda. Bu haqda Hindiston mudofaa vazirligidagi manbaga tayanib, ANI axborot agentligi xabar bermoqda:

«... S-400 ning uchinchi polk to‘plamini yetkazib berish kelasi yilning yanvar-fevral oylarida boshlanishi rejalashtirilgan...»

Hindiston avvalroq Rossiyadan olingan, mamlakatning shimoli-g‘arbiy mintaqasida xavfsizlikni ta’minlash uchun joylashtirilgan ikkita polk S-400 havo mudofaa tizimlarini ishga tushirdi.

Rossiya va Hindiston o‘rtasida S-400 yetkazib berish bo‘yicha shartnoma 2018 yil oktabr oyida imzolangan. 5 ta polk to‘plamining narxi 5,43 milliard dollarni tashkil qiladi.

Tizim ballistik va qanotli raketalarni, qiruvchi samolyotlarni va uchuvchisiz uchish apparatlarini 400 kmgacha bo‘lgan masofada tutib olishi mumkin.