Gabrielyus Landsbergis: "Biz Rossiyani yengish qo‘rquvini yengishimiz kerak"

Litva tashqi ishlar vaziri Gabrielyus Landsbergis Berlinni Rossiyani Ukrainadagi mag‘lubiyat yoqasiga qo‘yishdan qo‘rqayotganlikda bilvosita aybladi. «Menimcha, biz muhokama qilishimiz kerak bo‘lgan eng muhim narsa qo‘rquvdir, - dedi u 23 yanvar, dushanba kuni Bryusselda bo‘lib o‘tgan Yevropa Ittifoqi tashqi siyosati vazirlari yig‘ilishida. - Qo‘shimcha sanksiyalar yoki Ukrainaga qo‘shimcha harbiy yordam choralari haqida gap ketganda, biz Rossiyani yengish qo‘rquvini yengishimiz kerak».

Landsbergisning ta’kidlashicha, yevropaliklarni sanksiyalar yoki harbiy yordamni kuchaytirishdan to‘xtatayotgan narsa, agar Rossiya urushda mag‘lub bo‘lsa, nima bo‘lishidan qo‘rqishdir. Yadro urushi boshlanishidan qo‘rqasizmi, degan savolga Litva vaziri Moskvani mag‘lub etish kerak, deb javob berdi. «Agar biz Rossiya urushda yutqazishiga tayyorlanmasak, demak, Ukrainaga bu urushda g‘alaba qozonishiga yordam berishga jiddiy yondashmaymiz», dedi u.

Agar ushbu haqiqat qabul qilinsa, Landsbergisning so‘zlariga ko‘ra, qolgan savollarga javob berish ancha osonlashadi. «Shunda biz Ukrainaga kerak bo‘lgan barcha qurol-yarog‘larni yetkazib bera olamiz va Rossiyaga qarshi urush olib borishiga to‘sqinlik qiladigan sanksiyalarni qo‘llashimiz mumkin, shu yo‘l bilan Ukrainaga haqiqatan ham barcha hududlarini qaytarishga yordam bera olamiz», - deya qo‘shimcha qilib o‘tdi u.

Ukrainaga tank yetkazib berish haqida gapirar ekan, Landsbergis Kiyev ularni qabul qilib olishini yana kutishni istamasligini, ammo buni qilish kerakligini ta’kidladi. U asosiy jangovar tanklarni yetkazib berish bo‘yicha davom etayotgan muhokamalar ijobiy qarorga olib kelishiga umid bildirdi.