Ana xolos! Belarus va Ukraina o‘rtasidagi "chegara"ni o‘g‘irlab ketishdi

Belarusda noma’lum kimcha chegara belgisini Ukraina hududiga olib chiqib ketgani uchun jinoiy ish ochildi. Belarus chegarachilariga ko‘ra, bu qo‘shni davlat vakillari tomonidan sodir etilgan provokasiyadir.

Belgining o‘g‘irlanishi bilan bog‘liq voqea 13 yanvar kuni sodir bo‘lgan. Bu haqda 23 yanvar, dushanba kuni Mozir chegara otryadining rasmiy vakili Sergey Pavlovning «Belarus 1» telekanalida e’lon qilingan ma’lumotlariga tayanib, «TASS» agentligi xabar berdi.

Yo‘qotish Belarus chegara otryadi tomonidan davlat chegarasining bir qismini qo‘riqlash vaqtida aniqlangan. Belgi yerga sindirilgan va voqea joyidan izlar Ukraina hududiga olib borgan. Voqea bo‘yicha Belarus tergovchilari bezorilik bo‘yicha jinoiy ish qo‘zg‘atdi.

Belarus chegara xizmati vakillarining so‘zlariga ko‘ra, so‘nggi bir necha oy ichida Ukraina tomoni tomonidan ko‘plab provokasiyalar qayd etilgan. Umuman olganda, o‘tgan yili kamida 88 ta bunday holat kuzatilgan.

Aksariyat hodisalar kechasi sodir bo‘ladi. Noma’lum shaxslar allaqachon yorug‘lik moslamalari yordamida videokuzatuv kameralarining yozuvlarini bir necha marta buzgan. Bundan tashqari, chegarachilar Ukraina hududida bo‘lgan ayrim shaxslar tomonidan doimiy ravishda haqorat va ruhiy bosimga duchor bo‘lmoqda. Kuchli ovoz kuchaytirgichlar Belarus hududi tomon yo‘naltiriladi va «provokasion va tashviqot xarakteridagi» audioyozuvlar ijro etiladi.

23 yanvar kuni Belarus rahbari Aleksandr Lukashenko 2023 yilda davlat chegarasini himoya qilish to‘g‘risidagi qarorni tasdiqladi.