Akademik liseylarga qabul: muhim 5 savolga 5 javob
Hujjat topshirish qachondan boshlanadi? Imtihonni onlayn kuzatsa bo‘ladimi? Natijalar qachon e’lon qilinadi?
- Akademik liseyga kirish uchun tanlovlar necha bosqichda bo‘lib o‘tadi?
Akademik liseylarga qabul maktablarning 9-sinf o‘quvchilari orasidan 2 bosqichli tanlov asosida amalga oshiriladi.
- Dastlab o‘quvchilarning psixologik-pedagogik jihatdan rivojlanishiga tashxis qo‘yiladi (dastlabki tanlov).
Mazkur tanlov Maktabgacha va maktab ta’limi vazirligi hamda Oliy ta’lim, fan va innovasiyalar vazirligi tomonidan har yili 10 iyungacha maktablardagi iqtidorli o‘quvchilarni aniqlash maqsadida psixologik-pedagogik tashxis qo‘yish usullaridan foydalangan holda o‘tkaziladi.
- Dastlabki tanlovdan o‘tgan o‘quvchilarni akademik liseylarga o‘qishga qabul qilish uchun imtihon tashkil etiladi.
- Qabul qachondan boshlanadi?
Dastlabki tanlovdan o‘tgan o‘quvchilarning imtihonda qatnashish uchun arizalari Maslahat kengashi tomonidan har yili 20 iyundan 30 iyungacha qabul qilinadi.
Har bir akademik liseyda o‘quvchilarni qabul qilish bo‘yicha akademik lisey direktori raisligida Maslahat kengashi tashkil etiladi.
Akademik liseylarga o‘quvchilarni qabul qilish kvotasi har yili 15 iyungacha o‘qishga qabul qilish bo‘yicha davlat komissiyasi tomonidan tasdiqlanadi.
- Qanday hujjatlar topshirish kerak?
Imtihonda qatnashish uchun quyidagi hujjatlar taqdim etiladi:
ta’lim yo‘nalishi, o‘quv tili, shakli ko‘rsatilgan ariza;
tug‘ilganlik haqidagi guvohnoma yoki pasport yoxud ID nusxasi;
3,5x4,5 sm 6 ta rasm.
Arizalarni o‘quvchining ota-onasi yoki ota-onasining o‘rnini bosuvchi shaxslar ham berishi mumkin.
O‘qishga imtihonsiz kirish huquqini beruvchi xalqaro va respublika olimpiadalari, tanlovlar, musobaqalar g‘oliblari diplom, sertifikat, guvohnoma yoki boshqa tasdiqlovchi hujjatlarning aslini topshiradi.
Maslahat kengashi yuqoridagi hujjatlar to‘liq bo‘lganda o‘quvchining hujjatlarini qabul qilishni rad etishi mumkin emas.
Shuningdek bugungi kunda, akademik liseylarga onlayn hujjat topshirish tizimi yo‘lga qo‘yilgan. O‘quvchilar hujjatlarini https://litsey.edu.uz/ portali orqali topshirishi mumkin, bunda barcha hujjatlarning nusxasi biriktiriladi.
- Imtihon qachon o‘tkaziladi, ularni onlayn kuzatsa bo‘ladimi?
Imtihonlar har yili 10 iyuldan 25 iyulgacha reja asosida o‘tkaziladi.
Imtihon kuni, imtihon fanlari ro‘yxati va imtihon shakli 10 kun oldin o‘quvchilarga ular o‘qiyotgan maktab yetkaziladi, shuningdek, ommaviy axborot vositalari orqali e’lon qilinadi va akademik liseyning e’lonlar taxtasiga ilib qo‘yiladi.
Imtihonlar ijodiy yoki test sinovlari shaklida o‘tkaziladi.
Ijodiy imtihonlar og‘zaki, yozma ish, insho, bayon, diktant shaklida bo‘lishi mumkin.
Ijodiy imtihonlar har bir fan bo‘yicha kamida 5 – 7 nafar a’zodan iborat komissiya tomonidan o‘tkaziladi.
Imtihonlar katta binolarda o‘tkaziladi, imtihon jarayonlarini jamoatchilik va ota-onalar kuzatib borishi uchun onlayn efirga uzatilishi kerak.
- Imtihon natijalari qachon e’lon qilinadi?
Natijalar imtihondan keyingi kun akademik lisey qarashli bo‘lgan oliy ta’lim muassasasi yoki akademik lisey o‘zining rasmiy veb-saytida e’lon qilinadi.
Xalqaro olimpiadalar, tanlovlar, musobaqalar hamda fan olimpiadalari III bosqichida 1–5-o‘rinlarni egallagan o‘quvchilar imtihondan ozod etiladi va kvotasdan tashqari qabul qilinadi.
O‘qishga kirganlarning 9-sinfni bitirganlikka oid shahodatnomasi akademik lisey tomonidan o‘quvchining maktabiga so‘rov yuborish orqali olinadi.
Akademik lisey qaysi oliy ta’lim muassasasiga tegishli bo‘lsa o‘sha oliy ta’lim muassasasida Apellyasiya komissiyasi tuziladi. Imtihondan norozi bo‘lgan o‘quvchilar mazkur komissiyaga shikoyat qilishi mumkin.
