Зеленский НАТОни Россия билан урушга аралаштирмоқчими?

НАТОдан қирувчилар ва ракеталар талаб қилган Владимир Зеленский альянсни Россия билан ҳарбий можарога чорламоқда, Ғарб мамлакатлари РФ билан кескинлашувнинг янги босқичига чиқди, дейди Франция ҳарбий разведка бошқармаси собиқ раҳбари, генерал Кристоф Гомар.

Аввалроқ Украина президенти девони сайтида Ғарб мамлакатларининг Украинага танклар етказиб бериш ҳақида ниятидан сўнг Зеленский энди самолётлар ва ракеталар ҳам сўрай бошлагани хабар қилинган эди.

“2023 йил бизга нималар тайёрлаб қўйган, мен билмайман, аммо Украина президенти кўпроқ қирувчилар хоҳлаётганини кўриб турибмиз. Кучлар мувозанатини ўзгартириш учун у ҳужум қилмоқчи ва яна ҳужумга ўтмоқчи. Ўйлашимча, у НАТОни ушбу урушга аралаштирмоқчи. Биз кейинги босқичини ҳам кўриб турибмиз - балки эртага ҳарбий кемалар, ва ниҳоят, аскарлар сўрар?, - дейди у “Valeurs Actuelles” нашрига берган интервьюсида.

Унинг фикрича, Ғарб мамлакатлари Россия билан муносабатлар кескинлашувининг янги босқичига чиққан. “Биз оғир танклар етказиб бериш учун енгил қуроллар билан таъминлай бошладик. Ғарб мамлакатлари аста-секинлик билан урушга аралашиб бормоқда”,- дейди разведка бошқармасининг собиқ раҳбари.

Россия аввалроқ Украинани қуроллар билан таъминлагани туфайли НАТО мамлакатларига нота юборган эди. Россия ТИВ раҳбари Сергей Лавров Украина учун қуроллар ортилган ҳар бир транспорт воситаси Россиянинг қонуний нишонига айланишини маълум қилган эди. Россия президенти матбуот котиби Дмитрий Песков Украинани қурол билан қўллаб-қувватлаш Россия-Украина музокараларининг ривожланишига олиб келмаслиги ва салбий таъсир кўрсатишини айтган эди.