"Яшил кўзли афғон қизи" Афғонистондан эвакуация қилинди

Италия бутун дунёга "яшил кўзли афғон қизи" номи билан танилган Шарбат Гуланинг Афғонистондан эвакуация қилинганини эълон қилди.

National Geographic муқовасидаги сурати билан дунё эътиборини тортган афғон аёл Шарбат Гула айни дамда Римда.

Афғонистонда ишлаётган ёрдам ташкилотлари Гуланинг мамлакатни тарк этиши ҳақидаги илтимосини Италия ҳукуматига етказди. Бу талабга ижобий жавоб берганликларини билдирган Рим, Гуланинг кенг кўламли эвакуация дастури доирасида Италияга олиб келинганини маълум қилди.

1985 йилда америкалик фотограф Стив Маккаррининг Покистондаги қочқинлар лагерида олган сурати National Geographic муқовасида чоп этилгандан сўнг Гула дунёдаги энг машҳур афғон қочқинига айланган эди.

Шарбат Гула Собиқ Совет Иттифоқи 1979 йилда Афғонистонга бостириб кирганидан бир неча йил ўтиб Покистонга кўчиб келган миллионлаб афғонлардан бири эди.

Бомбардимонда оиласини йўқотган қизнинг чеҳрасидаги безовталик, уруш фожиасини тасвирлайдиган чуқур нигоҳ бутун дунё эътиборини Афғонистондаги воқеаларга қаратган эди.

Суратдаги қизнинг шахси узоқ вақт давомида топилмади. Шу сабабли 2002 йилда National Geographic гуруҳи, жумладан Маккарри Гулани топиш учун Афғонистонга жўнаб кетишди. Жамоа Афғонистоннинг чекка ҳудудида Гулани топишга муваффақ бўлишади.

2016 йилда сохта гувоҳнома билан қўлга олинган Гула Покистондан депортация қилинган ва Афғонистонга жўнатилган.

Август ойида Толибон Афғонистонда назорат ўрнатгач, Италия сентябр бошида эвакуация дастурини бошлаб юборган ва беш минг киши Италияга олиб келинган.

Рим шу ой бошида Афғонистоннинг биринчи аёл бош прокурори Мария Баширга Италия фуқаролигини берганини очиқлаган эди.