Японияда 100 ёшдан ошганлар сони биринчи марта 92 мингдан ошди

Японияда 100 ёшдан ошган узоқ умр кўрганлар сони илк бор 92 мингдан ошди.

Бу ҳақда Япония Соғлиқни сақлаш, меҳнат ва ижтимоий ҳимоя вазирлиги Кексаларни қадрлаш куни муносабати билан берган баёнотида маълум қилди.

Маълум қилинишича, 15-сентябр ҳолатига кўра, Японияда 100 ёшдан ошган 92 139 нафар фуқаро истиқомат қилади. Маълумотларга кўра, сўнгги 50 йил ичида уларнинг сони мамлакатда кўпайиб бормоқда. Жорий йилда уларнинг сони 1500 нафарга ошди. Вазирликнинг таъкидлашича, бу йил 47 107 киши ўзининг 100 йиллигини нишонлайди.

1963 йилда Японияда кекса фуқароларнинг ижтимоий таъминоти тўғрисида қонун қабул қилинди. Ўшанда мамлакатда 100 ёшдан ошганлар сони 153 нафарни ташкил қилган. 1981 йилда уларнинг сони 1000 га, 1998 йилда 10 000 га, 2012 йилда 50 000 тага етди. Бошқа мамлакатларда бўлгани каби, Японияда ҳам аёллар эркаклардан узоқроқ яшайдилар. Бу ерда аёлларнинг ўртача умр кўриши 87 ёшдан, эркаклар учун эса 81 ёшдан ошган. 107 ёшли Фуса Тасуми Япониянинг энг кекса фуқароси ҳисобланади. У 1907 йил 25 апрелда туғилган. Қариндошларининг айтишича, у оддий ҳаёт кечирган. Уларнинг фикрича, Фуса Тасумининг узоқ умр кўриш сири тўғри овқатланишдадир.