Янги Сурия Россия билан ҳарбий базалар бўйича музокара олиб бормоқда

Сурия мудофаа вазири Мурчаф Абу Қасра Россиянинг Ўрта ер денгизи қирғоғидаги ҳарбий-денгиз ва ҳарбий-ҳаво базаларини сақлаб қолиш масаласига тўхталиб, бу фақат мамлакат миллий манфаатлари инобатга олинган тақдирдагина амалга оширилишини айтди. Унинг сўзларига кўра, Россиянинг янги ҳукуматга нисбатан муносабати «Асад режими декабрь ойида қулаганидан кейин сезиларли даражада яхшиланган».

💬 «Сиёсатда абадий душманлар йўқ», — деди Абу Қасра Washington Post нашрига берган интервьюсида. У Москва билан ҳарбий ҳамкорлик давом этиши мумкинлигини таъкидлаб, Россиянинг Тартусдаги ҳарбий-денгиз базаси ва Латакиядаги Хмеймим авиабазаси ҳақида шундай деди: «Агар бу Сурияга фойда келтирса, биз буни қўллаб-қувватлаймиз».

🔹 Асосий масалалардан бири — собиқ президент Башар Асаднинг тақдири. У декабрь ойининг бошида Москвага қочиб кетган. Абу Қасра вақтинчалик ҳукумат раҳбари Аҳмад аш-Шара ўтган ой Россияга Асадни экстрадиция қилиш сўровини берган-бермаганига аниқлик киритмади, аммо бу масала музокаралар давомида кўтарилганини тасдиқлади.

🔹 Россия ТИВ раҳбар ўринбосари Михаил Богданов Асаднинг статуси борасида изоҳ бермади. «Биз Россия фуқаролари ва объектларига сўнгги воқеалар таъсир қилмагани учун миннатдорчилик билдирдик», — деди Богданов ва Россиянинг ҳарбий иштироки борасида қўшимча музокаралар зарурлигини таъкидлади.

🔹 Айни пайтда Россиянинг Суриядаги ҳарбий иштироки фақат иккита объект — Тартус ва Латакия базаларигача қисқарган. Айниқса, ҳарбий-денгиз базаси стратегик аҳамиятга эга бўлиб, Россиянинг Ўрта ер денгизидаги мавжудлигини таъминлайди.

🔹 Шу билан бирга, Сурия расмийлари АҚШ ва Туркия билан ҳам ҳарбий базалар масаласида музокара олиб бормоқда. Ҳукумат бир неча давлат билан мудофаа келишувларини имзолаш имкониятини кўриб чиқмоқда.