Янги ҳарбий-ватанпарварлик боғи очилди

Термиз шаҳрида “Ватанпарварлар” ҳарбий-ватанпарварлик боғи фойдаланишга топширилди.

Давлат ва жамоат ташкилотлари вакиллари, ҳарбий хизматчилар, нуронийлар ва ёшлар иштирок этган тадбирда ёш авлодни Ватанга муҳаббат, юртга садоқат руҳида тарбиялаш, уларни миллий ва умуминсоний қадриятларга ҳурмат ғояси атрофида бирлаштириб, Ватан ҳимоячиларини тарбиялашда узвийликни таъминлашга алоҳида эътибор қаратилаётгани таъкидланди.

Президентимизнинг жорий йил 11 сентябрдаги “Ўзбекистон – 2030” стратегиясини 2023 йилда сифатли ва ўз вақтида амалга ошириш чора-тадбирлари тўғрисида”ги қарорига мувофиқ қурилган янги боғ ҳудудларда “Ватанпарварлар” ҳарбий-ватанпарварлик боғларини барпо этиш, мавжуд боғларни такомиллаштириш бўйича белгилаб олинган чора-тадбирлар доирасида бунёд этилди.

Шаҳарнинг марказида ташландиқ бўлиб қолган ҳудудда қад ростлаган боғ ҳарбий-ватанпарварлик йўналишидаги ишлар самарадорлигини оширишга хизмат қилади. 3.8 гектар майдонда барпо этилган ҳарбий-ватанпарварлик боғи вилоят ёшларининг қизиқиш ва интилишлари эътиборга олиниб, ватанпарварлик, маданий ҳордиқ, спорт ва маънавий озуқа ҳудудларига ажратилган. Бу ерга келувчиларнинг мароқли ва мазмунли хордиқ чиқариши учун барча шароит яратилган.

Ўзига хос дизайнга эга боғда ҳарбий техника ва қурол-аслаҳаларни намойиш этиш майдони, ҳарбийлаштирилган тўсиқлар йўлаги, ёшларда тезлик, куч, эпчиллик, чаққонлик, аниқлик, чидамлилик ва қатъиятлилик каби хислатларини ривожлантириб, жисмонан соғлом бўлишга кўмаклашадиган “Мардлар йўлаги”, “Workout” майдони, мустақиллик йилларида хизмат бурчини бажаришда ҳалок бўлган 28 нафар ҳарбий хизматчи хотирасига бағишлаб, мангу олов порлаб турган айлана шаклидаги хотира бурчагида сиймолари акс этган “Қаҳрамонлар номи барҳаёт” бурчаги ташкил этилган.

Махсус бино ичида миллий ҳунармандчилик ишлари намойиш этиладиган, уста ҳунармандлар ёшларни ҳунармандчилик сир-асрорларига ўргатиш бўйича маҳорат дарслари ўтказадиган ҳунармандлар маркази, “Paintball”, болалар ўйин майдонлари ва аттракционлар, ёшлар кутубхонаси, ўқ отиш тири, Book-cafе ,скалодром ,от манежи, блиндаж кўринишидаги кафе, картодром (karting), боулинг маркази, жанг майдонидаги блиндажлар қад ростлади.

Боғнинг бошқа дам олиш масканларидан фарқи шундаки, бу ерда ёш авлод қалбида миллий руҳни улғайтиб, уларнинг маънавиятини юксалтириш учун барча шароит муҳайё қилинган. Атрофи кўкаламзорлаштирилган кўркам “яшил макон” барпо этилган.

Боғни бунёд этишда фаол иштирок этган бир гуруҳ ҳарбий хизматчиларга совғалар топширилди.

Тантанали маросимда вилоят ҳокими Улуғбек Қосимов сўзга чиқди.