Хотин-қизларни қийнаётган ҳуқуқий масалаларга ечим изланди
Ўзбекистон Республикаси Вазирлар Маҳкамасининг 2022 йил 31 мартдаги “Хотин қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги 145-сонли қарори ҳамда Олий суднинг 2022 йил 23 апрелдаги МИБ-61/22-сонли топшириғи ижроси доирасида судьялар томонидан жойларда фуқаролар билан давра суҳбати ўтказиб келиняпти. Бу ҳақда Тошкент шаҳар суди матбуот котиби Садоқат Аллаберганова хабар қилди.
Галдаги учрашув Сирғали тумани “Иттифоқ” МФЙ биносида бўлиб ўтди. Унда Тошкент шаҳар судининг жиноят ишлари бўйича судьяси Хамиджон Шамшиев, жиноят ишлари бўйича Сирғали туман суди судяьлари Фарҳод Шукуров, Шерзод Юлдашев, Анвар Дусмуродов ва Сирғали туман ИИО ФМБ Пробация бўлими ходимлари, “Иттифоқ” МФЙ раиси, жами 20 кишидан иборат маҳалла фаоллари ва “Темир дафтар”га киритилган аёллар иштирок этишди.
Кун тартибига қўйилган масала эса “Иттифоқ” маҳалла фуқаролар йиғинидаги “Аёллар дафтари”га киритилган хотин-қизлар билан ҳуқуқий масалалари юзасидан суҳбат ўтказиш, уларнинг мурожаатлари ва муаммоларини ўрганиш ҳамда ҳал этишдан иборат.
“Иттифоқ” МФЙ раиси йиғилишни очиб, кун тартибини эълон қилгач, сўз навбати жиноят ишлари бўйича Сирғали туман суди судьяси Фарҳод Шукуровга берилди.
Фарҳод Шукуров томонидан мамлакатимизда сўнгги йилларда суд-ҳуқуқ соҳасида олиб борилаётган ислоҳотлар, аёлларнинг ижтимоий муҳофазаси, уларни қўллаб қувватлаш борасида қабул қилинаётган давлат дастурлари ва қонунлар ҳақида маъруза қилиниб, “Иттифоқ” маҳалла фуқаролар йиғинида “Аёллар дафтари”га киритилган хотин-қизлар ижтимоий ҳимояга муҳтож ва ишсиз аёллар, боқувчисини йўқотган эҳтиёжманд аёллар, ижтимоий ёрдамга муҳтож I ва II гуруҳ ногиронлиги бўлган аёллар, тиббий ҳимояга муҳтож эҳтиёжманд 15 нафар аёлларнинг ҳуқуқий масалалари ҳамда ижтимоий соҳадаги саволлари бўйича атрофлича жавоблар берилди.
— “Аёллар дафтари”га киритилган хотин-қизлар томонидан, жумладан, муқаддам Жиноят кодексининг айрим моддалари билан судланиб, жазони ўтаб чиққан шахсларнинг судланганлик ҳолатини олиб ташлаш, жазодан муддатидан илгари шартли озод қилиш, оила ва никоҳ масалаларига оид, шунингдек ижтимоий ҳимояга муҳтож, ишсиз ва боқувчисини йўқотган эҳтиёжманд аёлларга уй-жойлар ажратиш бўйича банк муассасаларидан имтиёзли кредитлар ажратилиши ва уй-жойга эгалик қилиш бўйича берилган саволлар ҳамда мавжуд муаммоларни ҳал этиш юзасидан ҳуқуқий тушунтиришлар ва тавсиялар берилди, - дейди Тошкент шаҳар суди судьяси Хамиджон Шамшиев.
Йиғилиш сўнгида туман суди судьялари Шерзод Юлдашев ва Анвар Дусмуродов жиноятчилик ва ҳуқуқбузарликларни олдини олишга қаратилган профилактик чора-тадбирларни кучайтириш, аниқ мақсадга йўналтирилган тадбирларини олиб боришда ҳуқуқий маданиятни ошириш ва жамоатчилик назоратини кучайтириш бўйича тушунтиришлар берди.
Йиғилиш қатнашчилари келгусида ушбу мазмундаги суҳбатларни мунтазам равишда тез-тез ўтказиб туриш, фуқаролар орасида тарғибот ишларини кучайтириш лозимлиги ҳақида таклифларини билдиришди.
