Ўзбекистонлик йигит Россиянинг энг сердаромад тиктокери деб топилди
Forbes рус тилида сўзлашувчи тиктокчилар даромадларининг биринчи рейтингини тузди, деб хабар бермоқда Meduza. Бунинг учун журнал 50 та машҳур TikTok фойдаланувчиси профилларини таҳлил қилди ва реклама берувчилар ҳамда мусиқа лейбллари 2019 йилнинг 1 июлидан 2020 йил 30 июнгача қанча пул тўлаганлигини ҳисоблаб чиқди.
Биринчи ўринни 9,5 миллион нафар обуначига эга ўзбекистонлик 22 ёшли Раҳим Абрамов эгаллади. Forbes ҳисоб-китобларига кўра, ўтган йилда унинг TikTok’дан олган даромади 10,47 рублни ташкил қилди.
Forbes’нинг ёзишича, Раҳим Абрамов Ўзбекистонда туғилган, 16 ёшида спорт мактабида ўқиш учун Читага кўчиб келган. У ерда компьютерларга дастурий таъминот ўрнатиб пул топган. Ўқишга кира олмагач, ишлаб топган пулларини сарфлаб, Москвага келган ва шу ердаги техникумга ўқишга кирган. Пойтахтга келган пайтида ёнида 10 минг рубль пули бўлган холос.
Нашрнинг қайд этишича, Абрамов дўсти билан пул ишлаш учун қисқа видеолавҳалар — вайнлар олишни бошлаб, Instagram’даги лойиҳага «Не мажори» деб ном берган ва бир йил ичида 300 мингга яқин обуначи тўплаган. Аммо ўзининг дастлабки каттароқ пулини уч йил аввал ўзи мустақил равишда видео суратга олишни бошлаганда ишлаб топган. Биринчи ойда 100 000 рубль ишлаган. Кейинроқ 200 минг рубль йиғган ва бор пулига камера сотиб олган.
«Авваллари Instagram’даги пост нархи 600-700 минг рубль атрофида эди. Ҳозир мен фақат шартномалар асосида йирик лойиҳалар қиламан, чунки мен энди артистман», — деган Раҳим Абрамов Forbes Digest’га берган интервьюсида.
Рейтингнинг иккинчи поғонасини тожикистонлик 21 ёшли Дина Саева эгаллади. Унинг 16,4 миллион нафар обуначилари бор. Йил давомида тўплаган даромади эса 4,93 миллион рублга баҳоланган.
Ундан кейинги ўринни Беларусдан бўлган 23 ёшли Алексей Савко олган. У 6,5 миллион нафар обуначига эга профилидан 4,81 миллион рубль ишлаб топган.
Рўйхатдан ўрин олган қолган тиктокерлар ҳақида қуйидаги ҳавола орқали танишиш мумкин.
