Ўзбекистонда қисқичбақаларни етиштириш бўйича лойиҳа тасдиқланди
«Ўзбекбалиқсаноат» уюшмаси Жанубий Корея билан Ўзбекистонда қисқичбақаларни саноат миқёсида етиштириш бўйича «биринчи» лойиҳани ишга туширишга келишиб олди, деб хабар бермоқда «Подробно.уз» мухбири.
Шунингдек, мамлакатимизда балиқчилик соҳасини такомиллаштириш ва ислоҳ қилиш билан шуғулланаётган уюшма балиқчилик соҳасида тажрибага эга хорижий давлатлар билан яқин ҳамкорлик алоқаларини ўрнатиб, республикамизда амалга ошириш учун қатор лойиҳаларни таклиф этган.
Жумладан, Венгрия мутахассислари билан биргаликда Ўзбекистонда селекция маркази ташкил этилади. У мавжуд балиқ турларининг популяциясини янгилаш ва янги турларни иқлимлаштиришга ихтисослашади.
Нидерландия ва Эрон билан биргаликда республикамизда балиқ озуқаси ишлаб чиқарувчи дунёнинг етакчи компанияларининг филиаллари очилади, Хитой билан биргаликда «Қизил китоб»га киритилган балиқ турларининг популяциясини тиклаш лойиҳасини амалга ошириш режалаштирилган.
