Ўзбекистон Қишлоқ хўжалиги вазири БМТ FAO конференсиясида нутқ сўзлади
Жорий йилнинг 24 июнь куни БМТнинг Озиқ-овқат ва қишлоқ хўжалиги соҳасидаги ташкилоти (FAO) конференсиясида Ўзбекистон Қишлоқ хўжалиги вазири Жамшид Ходжаев нутқ сўзлади. Бу ҳақда Қишлоқ хўжалиги вазирлиги матбуот хизмати «Дарё»га хабар берди.
Вазир бугунги кунда Ўзбекистонда қишлоқ хўжалиги соҳасида янгича институционал ислоҳотлар бошлангани, бу эса Президент Шавкат Мирзиёев ташаббуси билан қабул қилинган мамлакатнинг беш йиллик тараққиёт стратегиясидан келиб чиққан ҳолда амалга оширилаётганини таъкидлади.
Вазир дастлаб конференсияда бутун дунё эътиборини тортаётган муаммо — Озиқ-овқат хавфсизлигини таъминлаш масаласига алоҳида эътибор қаратди. Албатта, бу масалани ҳал этишда ҳар бир давлатнинг ўзига хос ўрни борлиги, Ўзбекистон бу борада қўшни давлатлар билан яқин ҳамкорликни ўрнатиш орқали Марказий Осиё минтақасида савдо-сотиқ тартибларини соддалаштириш борасидаги кўплаб муаммоларни ечишга муваффақ бўлаётгани сезиларли натижаларни бермоқда.
Шунингдек, БМТ шафелигида Ўзбекистоннинг Оролбўйи минтақаси учун Инсон хавфсизлиги бўйича кўпшериклик траст фонди ташкил этилгани эса кўплаб давлатлар бу жамғарма фаолиятини қўллаб-қувватламоқда.
Қайд этилганидек, яқинда Ўзбекистонда қишлоқ хўжалигида ер ва сув ресурсларидан самарали фойдаланиш борасида аниқ вазифалар белгиланган бўлиб, айни пайтда мамлакатда ўзлаштириш имкони бўлган 1 миллион гектардан ортиқ майдон қайта фойдаланишига эришилади. Бу эса республикада амалга оширилаётган муҳим ислоҳотлардан биридир. Шу боисдан Ўзбекистон бу борада ҳамкорлар билан ишлашга тайёр эканлигини маълум қилди.
Қишлоқ ҳудудларини ривожлантириш, аҳоли, айниқса, ёшларни иш билан таъминлаш муҳим йўналишлардан бири бўлиб, бу борада Президент саъй-ҳаракатлари билан барқарор ривожланиш мақсадларини амалга оширишда гендер тенглигини таъминлаш, хотин-қизларнинг қишлоқ хўжалигидаги ўрнини ошириш борасидаги ишларни кенгайтиришга кенг йўл берилмоқда.
Конференсияда маърузада баён этилган масалалар хорижлик мутахассислар томонидан қўллаб-қувватланди.
Manba: daryo. uz
