Уругвай – Ўзбекистон: 3-0. Шармандали мағлубият, аммо...

Уругвай терма жамоасига қарши кечган ўйинни ўзгача иштиёқ билан кўрдим. Яхши ўйин бўлди. Мен кутган ва кутмаган жараёнлар кузатилди.

Ўйиндан олдин икки хил фикрга эга эдим. Агар Оскар Табарез мазкур ўйинга иккинчи таркибни туширса, вакилларимизда ўйинда ижобий натижага эришиш учун имконият бўлади. Ёки агар уругвайликлар асосий таркибда майдонга тушишса, мағлубиятга учрашимиз деярли аниқ. Йўқ, бу пессимистик фикр эмас, шунчаки вазиятга реал қараш. Ахир Суперлигада тўп тепиб юрган футболчилар билан “Барселона” ва “ПСЖ” каби клубларда ўйнаб юрган футболчиларнинг ўртасида катта фарқ бор. Бу ўз-ўзидан тушунарли. Шу боис уругвайликлар асосий таркибда тушганини кўриб, ўзимни мағлубиятга руҳан тайёрладим, шунинг учун йирик ҳисобдаги мағлубият менга унча таъсир қилмади, қолаверса, бу ўйиндан мақсад ғалаба қозониш ҳам эмасди.

Мақсад биринчи навбатда кучли терма жамоалар билан ўйнаш анъанасини бошлаш. Узоқ муддат ўта кучсиз терма жамоаларни топиб келган собиқ терма жамоалар марказининг совуқ анъанасига чек қўйиш эди. Ҳартугул буни уддаладик. Яқин-яқингача Уругвай каби терма жамоага қарши ўртоқлик ўйинини ўтказиш фақат хаёлларимизда эди, холос. Суперлигада ўйнаб юрган футболчилар, ёш футболчилар учун эса Суарес ва Кавани каби футболчиларга қарши тўп тепиш яхшигина мактаб бўларди.

Энди бевосита ўйинга тўхталсак. Вакилларимиз ёмон ўйнашмади. Рақиб битта голини пеналтидан киритганини ҳисобга олсак, ҳимоямиз ҳам яхши ҳаракат қилди. Тўғри, ҳаяжонланиш ҳаддан ортиқ кўп бўлди, арзимаган ҳолатларда тўпни йўқотдик, аммо бу табиий. Худо хоҳласа, бу ёшлар ҳозирданоқ ана шундай жиддий рақибларга қарши ўйнаб, тажриба орттиришса, яқин келажакда Осиёнинг исталган термасига қарши бемалол ўйнайдиган бўлишади. Бугун учун уларнинг бундай ўйинлардан керакли хулоса чиқара олишига кўмаклашувчи тажрибали мураббий лозим. Қолаверса, бу каби муҳим ўйинларни кўпайтириш керак.

Темур Кападзе айни дамда бош мураббийликка муносиб эмас. Футболчиларимиз биринчи бўлимда яхши ҳаракат қилишганди. Аммо гол ўтказиб юборгач, иккинчи бўлимда ўйин сусайди. Мантиқан олиб қаралганда эса аксинча бўлиши керак эди. Афтидан, танаффусда Темур Кападзе мағлубиятни тан олган ва футболчиларни иккинчи бўлимга руҳан тайёрлай олмаган кўринади. Мураббий эса аслида рақиб ким бўлишидан ва натижа қандай бўлишидан қатъИ назар футболчиларнинг руҳиятни ошира олиши керак.

Хулоса қилиб айтганда, Уругвайга қарши ўйин ёш футболчиларимиз учун яхши мактаб бўлди. Келинг, уларни танқид қилмайлик, агар шундай жамоаларга қарши ўйнайверсак, Яман, Ливан, Уммон каби қирликларда юраверишни тўхтатамиз ва Уругвай каби катта тоғларни забт этишни ўрганамиз. Бу эса хатоларсиз, ҳаяжонларсиз ва бугунги каби мағлубиятларсиз бўлмаслиги табиий. Унутманг, сиз бугун Суперлига ва Европа футболи ўртасидаги тўқнашувни кўрдингиз. Бу футболчилар бизнинг келажагимиз, ишонаверинг.

Низомжон ИСЛОМОВ