«Украинанинг келажаги шарқий жанг майдонларига боғлиқ» — Зеленский

Украина президенти Владимир Зеленский мамлакатнинг келажаги Бахмут ва унинг шарқидаги бошқа муҳим шаҳар ва аҳоли пунктлари атрофида давом этаётган жанглар натижасига боғлиқлигини айтди.

“Шарқдаги ҳолат жуда оғир, жуда аянчли. Биз душманнинг ҳарбий қудратини йўқ қилишимиз керак ва буни албатта амалга оширамиз”, деди Зеленский.

"Белогоровка ва Маринка, Авдеевка ва Бахмут, Угледар ва Каменка", деди Зеленский асосий жанг майдонларини номлаб, "ва келажагимиз ҳал қилинадиган бошқа барча жойлар. Улар бизнинг келажагимиз, барча украиналикларнинг келажаги учун кураш кетаётган жойлардир”, дея таъкидлади президент.

"Мен ҳозир жанг қилаётган ҳар бир кишидан миннатдорман. Ёнма-ён турган биродарини сотмаган ҳар бир инсонга раҳмат айтаман", дея қўшимча қилди у.

Россия Бахмутнинг қўлга олиниши бутун Донецк вилояти устидан назорат ўрнатишга йўл очади, бу эса Москва учун урушнинг асосий мақсади эканини айтди.

Вагнернинг ёлланма қўшини бошчилигидаги рус қўшинлари Бахмутнинг шарқий қисмини эгаллаб олди, бироқ сўнгги ҳафталарда Украинанинг мағлубияти яқин экани ҳақидаги даъволарга қарамай, ҳозирча шаҳарни ўраб ололмади. НАТО ҳам ўтган ҳафта Бахмут бир неча кун ичида қулаши мумкинлиги ҳақида огоҳлантирган эди.