"У отиб ўлдирилган": Фарғона чегара постида бухоролик аскарнинг ўлими «ўз жонига суиқасд» деб расмийлаштирилди (видео)

"У отиб ўлдирилган": Фарғона чегара постида бухоролик аскарнинг ўлими «ўз жонига суиқасд» деб расмийлаштирилди (видео)

Ижтимоий тармоқларда Президентга йўлланган «Фарғона чегара постида отиб ўлдирилган марҳум аскар отасининг мурожаати» видеолавҳаси тарқалди. Унда Фарғона вилояти, Қувасой шаҳридаги Қирғизистон чегарасида тунги қоровулликда бўлган бухоролик оддий аскар Бобур Мирзаевнинг ҳалок бўлгани хусусида сўз борган. Бу ҳақда "Дарё" ёзмоқда.

Бобурнинг отаси Собир Мирзаев «Дарё»га Фарғона ҳарбий прокуратураси томонидан ўғлининг ўлими «ўз жонига суиқасд» деб расмийлаштирилаётганидан норозилиги ва бунга ишонмаслигини маълум қилди.

Марҳум ҳақида маълумот: Бобур Мирзаев 1999 йилда Бухоро шаҳрида туғилган. 2018 йилда Бухоро шаҳридаги 1-сонли академик лицейни тугатгач, Миллий гвардия институтига ҳужжат топширган ва етарли балл тўплай олмаган. Шундан сўнг ҳарбий хизматни ўташни маъқул кўрган. 6 март куни Бухоро шаҳар мудофаа бўлими томонидан ҳарбий хизматга чақирилган. Ҳарбий хизмат қасамёдини қабул қилгунга қадар Фарғона вилояти, Водил туманида жойлашган ДХХ чегара қўшинларининг 9229-ҳарбий қисмида ўтаган. Сўнг Қувасой шаҳридаги 9229-ҳарбий қисмнинг 9-сонли чегара постига кўчирилган.

9 июль куни Бухоро шаҳар Мудофаа бўлимидан Собир Мирзаевга ўғлининг ўз автоматини ўқлаб турган вақтида отилиб кетгани ва ҳалок бўлгани ҳақидаги нохуш хабар етказилган.

10 июль куни соат 10:00 да аскарнинг жасади тобутда келтирилган. Бухоро шаҳар Мудофаа ишлари бўлими вакиллари Бобур Мирзаев ўзини отиб қўйганини ва унинг ўлими билан боғлиқ бошқа сабаблардан хабардор эмасликларини билдиришган. Шу куни соат 13:00 да жасад тупроққа қўйилган.

«Дарё»га мурожаат қилган Собир Мирзаев ўғлининг сирли ўлими юзасидан ўтказилган суриштирув-тергов ишлари якунлангани, текширув натижалари ва хулоса ҳужжатларидан мутлақо қаноатланмаганини билдирди.

— Ўзим эксперт-врачман. «Ўз автоматини ўқлаб турганда бехосдан отилиб кетган» деган иддаога ишонмайман. Агар ўқ яқиндан отилган бўлса, қорин атрофини жароҳатлаб, куйишни вужудга келтиради. Ўғлимнинг жасадини кўрдим. У яқиндан эмас, узоқдан отилган. Қоринга киришда кичик из қолдирган ва бел соҳасидан чиқиб кетган. Автоматдан 1 дона эмас, 5 дона, шундан 1 дона пахтавон, 4 дона жанговар ўқ узилган. Кўп қон йўқотган ва ўлим юз берган. Суд-тиббий экспертизада кўрсатилганидек, биринчи ўқ тираб отилган бўлса, кейингисини ўқлашда ўзида куч топа оладими? Иккинчи ўқ бироз узоқ масофадан отилган. Хўш, қолган ўқлар қандай отилган? Баллистика тўлиқ ўтказилмаган.

Ҳолат ҳарбий қисм ёнидаги цемент заводи камерасига тушиб қолган. Техника асри даврида содир бўлган ҳолатни катталаштириб кўрсатишнинг иложи йўқ, дея важ кўрсатишди. Терговчи елка қисиб, «бу жумбоқ» дейишдан нарига ўтмайди. Ўзбекистон ҳарбий прокуратураси ўз жонига суиқасд қилинган, деган хулоса бериб турибди. Бу нотўғри, мен ишонмайман. Жасадини кўрганимда икки билагида куч ишлатилган доғ излари бор эди. Экспертизада эса буям кўрсатилмаган, — деди Собир Мирзаев.

8 август куни Ҳарбий прокуратура подполковниги Баҳром Жалолхўжаев Собир Мирзаевга ўғлининг ўлими юзасидан тергов ишлари тугатилганини маълум қилган.

9 август куни Республика ҳарбий прократураси томонидан Собир Мирзаевга хат келган. Унда: «Ўғлингиз, 9229-ҳарбий қисм оддий аскари Бобур Мирзаев, 2019- йил 9 июль куни чегара нарядини ўташ вақтида соат 12:10 ларда ўзига бириктирилган «АКМ» русумли ўқотар қуролдан ўзининг қорин соҳасига 1 дона 7,62 мм.ли пахтавон ва 4 дона 7,62 мм.ли жанговар ўқ узиб, ўз жонига қасд қилган. Ўтказилган терговга қадар текширув ҳаракатлари давомида Бобур Мирзаевга нисбатан ҳарбий хизматчилар томонидан ўзини-ўзи ўлдириш даражасига етказиш билан боғлиқ, яъни унга раҳмсиз муомала қилиш ёки ҳаракатлар содир этилмаганлиги, унинг ҳаётига бирор-бир шахс томонидан тажовуз қилинмаганлигини инобатга олиб, унинг ўз жонига қасд қилиб, вафот этганлиги ҳолатида бирор-бир шахс ҳаракатида ЎзРЖКнинг 103-моддаси ва бошқа моддаларида кўрсатилган жиноятлар таркиби бўлмаганлиги сабабли, 2019 йил 7 август куни ҳолат юзасидан ЎзРЖПКнинг 83-моддаси 2-бандига асосан жиноят иши қўзғатишни рад қилиш тўғрисида қарор қабул қилинди», — дея баён қилинган.

Фарғона вилояти ҳарбий прокурори, подполковник Шерзод Саидов томонидан эса Собир Мирзаевга содир этилган ҳолат юзасидан Фарғонага келиши фойдасизлиги билдирилган.

— Ўғлим 9-сонли чегара постида турган вақтида соат 12:10 ларда отишма бўлган. Ҳаял ўтмай, унинг қўлидаги рациясига чиқишган. Жавоб бермагач, ўғлимни 20 дақиқаларча қидиришган. Аввалига қирғизлар отиб, ўзи билан олиб кетган, деган ўйга ҳам боришганини яширишмади. Кейин Қирғизистон ва Ўзбекистон чегараси яқинидаги чуқурликдан, яъни окопдан ўғлимнинг жасади топилган. Окоп юқорисидан қон излари, атрофдан эса гилзалар топилган. Адолат қарор топиб, айбдор жавобгарликка тортилиши керак. Йўқса, одамлар фарзандларини ҳарбий хизматга бермай қўйишади, — дейди Собир Мирзаев.

«Ҳақиқат маскани» адвокатлик бюроси адвокати Амрилло Аҳмедов иш ҳужжатлари билан танишгандан сўнг Бобур Мирзаевнинг айнан ўз жонига қасд қилмагани, балки отиб ўлдирилгани ҳақидаги хулосага келганини айтади. Унинг билдиришича, Республика ҳарбий прокуратураси 15-бўлим бошлиғи Қобил Аннабоев «Ҳарбий сир, материал Фарғонага жўнатилади, ўша ерга қатнаб ўрганасизлар, улар нима деса шу!» деган пўписа билан ишга оид ҳеч қандай ҳужжат тақдим этмаган. Илтимосномалар қабул қилинмаган.

— Бобурнинг ўлимида «Ўз жонига суиқасд» деган важ кўрсатиляпти. Нотўғри. Бир ўқ қориндан кириб, нариги томондан чиқиб кетган. Ёнида 4 дона гилза турибди, улар қаердан пайдо бўлаяпти? Экспертиза хулосасига кўра, 4 та гилза ҳам битта автоматдан отилган. Бу мутлақо мантиққа тўғри келмайди. Воқеа жойини кўздан кечириш ҳолати, шунингдек, баённома сифатсиз тузилган, тергов ҳам юзаки ўтказилган. Хулосада қон излари айнан қаердан топилгани кўрсатилмаган. Жасад окопдан топилган экан, воқеа жойи чизмаланиб, эксперимент қилиниши шарт эди. Афсуски, бу ҳам бажарилмаган.

Ачинарлиси, автоматда ҳеч қандай бармоқ излари йўқ, бу эса ўз-ўзидан бармоқ излари ўчириб юборилганини англатади. Қуёш изларни йўқотган, деган кўрсатма берилган. Қуёш нурида излар йўқолиши мумкин эмас, тоғ орти қуёш нурлари эса деярли таъсир ўтказмайди. Соат 12:10 да ҳолат содир бўлган бўлса, бир соат ичида излар йўқолмайди. Аскар ўзини ўзи отган бўлса, қани бармоқ излари? Ҳолатни қайтадан ўрганиш ва қўшимча тергов ўтказиш учун хат ва илтимосномалар киритдик. Ниҳоят, оғир уринишлардан сўнг 20 августда жиноят иши қўзғатишни рад қилиш бўйича Фарғона вилоят прокуратураси терговчисининг қарори бекор қилинди,— дейди А. Аҳмедов.

Собир Мирзаев ва унинг адвокатига марҳум ўғли билан бир сафда хизмат қилган аскарлар билан суҳбатлашиш имкони берилган. Улар билан суҳбатда аскарлар «Бизга Бобур Мирзаев ўзини отган, деб айтилди, аммо биз бунга умуман ишонмаймиз» дейишган. Манбага кўра, шу куни навбатда турган аскарлардан бири битта, иккинчиси иккита автомат ўқининг овозини эшитганини айтган. Аслида аскар танасидан бешта ўқ топилган.

— Республика ҳарбий прокуратурасига Бобур Мирзаевнинг отаси ва унинг ҳимоячиси бир неча маротаба келган ҳамда улар раҳбарият томонидан қабул қилинган. Қабул жараёнида барча важлари текшириб кўрилиши айтилган. Ҳозирги вақтда Фарғона ҳарбий прокуратураси томонидан қўшимча тергов ҳаракатлари олиб борилмоқда. Терговга қадар текширув ҳужжатлари бўйича менда ҳозир аниқ маълумотлар йўқ. Бу бўйича Фарғона ҳарбий прокуратураси томонидан иш олиб бориляпти, — деди «Дарё» мухбирига Республика Ҳарбий прокуратураси матбуот хизмати вакили Шоҳруҳ Муҳаммаджонов.


Матнда хатолик топсангиз, ўша хатони белгилаб, бизга жўнатинг (Ctrl + Enter).

Бўлимга тегишли қизиқарли хабарлар

Фикр билдириш учун қайдномадан ўтишингиз сўралади ва телефон ракамни тасдиклаш керак булади!