Туркияда нега футболчиларнинг либосига фамилияси эмас, исми ёзилади?
Агар сиз футболнинг ашаддий мухлиси бўлсангиз ва халқаро футбол лигалари ва футбол жамоаларини кузатиб борсангиз, турк халқининг футболга ўзгача муносабатда бўлишини пайқаган бўлсангиз керак. Бошқа спорт турларига қараганда футбол турк халқи қалбида алоҳида ўрин тутади, десак муболаға бўлмайди.
Бироқ, турк халқининг футболга бундай муносабатининг шаклланишига нима сабаб бўлганини ҳеч ўйлаб кўрганмисиз? Мақоламизда нима учун футбол Туркияда энг оммабоп спорт турига айланганлиги ва футбол ҳақидаги бир қатор фактларга тўхталамиз.
Мамлакатдаги 1-рақамли спорт тури
Туркия Республика деб эълон қилинганининг дастлабки кунларидан бошлаб Турк ҳукумати ҳамиша оммабоп спорт тури бўлганлиги сабабли футболга катта сармоя йўналтиришга қарор қилди. Инвестициялар ҳеч ҳам тўхтамади, бу эса футболнинг Туркияда катта саноатга айланишига олиб келди. Туркия ҳукумати ва кўплаб инвесторларнинг доимий ёрдами мамлакатда футбол индустриясининг устуворлигини таъминлади.
Турк телевидениеси ва матбуотининг футболга алоҳида эътибор қаратиши минглаб инсонларнинг футбол билан ухлаб, футбол билан уйғониши, уни севиб томоша қилиши ва футбол билан шуғлланиши охир-оқибатда эса турк футболининг дунёда танилиши учун етарли бўлди. Спортга бўлган катта эътибор ва мухлисларнинг доимий қўллаб-қувватлаши Турк футбол клублари ва терма жамоаларининг Европа ва Жаҳон чемпионатларида муваффақиятли иштирок этишига олиб келди.
“Буюк учлик” атамаси Туркиянинг энг эски спорт клубларидан учтаси — “Бешиктош”, “Фенербаҳче” ва “Галатасарой”ни ифодалаш учун ишлатилади. Учала жамоа ҳам Истанбулда ташкил этилган бўлиб, улар бир-бири билан ўзаро доимий рақобатдадирлар. Чемпионатдаги асосий ўрин ва совринлар ҳам айнан мана шу 3 жамоа ўртасида тақсимланади. Улар иштирокидаги ўйинлар турк футбол дунёсида катта қизиқиш билан кузатилади.
Одамларни бирлаштириш
Туркияда минтақавий рақобат жуда муҳим, чунки Туркия одатда кучли минтақавий ўзига хосликларга эга бўлган давлатдир. Футбол одамлар учун мамлакат бўйлаб саёҳат қилиш, футбол клублари билан танишиш ва ўз ватанпарварликларини намойиш қилиш усулидир. Бу эса футболни ўз навбатида одамларни бирлаштирадиган спорт турига айлантиради.
Турк футболи ҳақида қизиқарли фактлар
Аввал айтиб ўтганимиздек, Туркия терма жамоаси Европа Чемпионатларида асосан муваффақиятли иштирок этган. Жамоа 2008 йилда ярим финалга қадар етиб бориб, чорак финалда Хорватия устидан пенальтилар сериясида 3:1 ҳисобида ғалаба қозонган.
Агар туркча исмлар билан таниш бўлсангиз, туркиялик футболчиларнинг формаларида фамилиялари ёзилмаганини, бунинг ўрнига уларнинг исмларининг ёзилганини кўришингиз мумкин. Бунинг сабаби эса Туркияда футбол фамилиялардан кўра қадимийроқ эканлигидадир.
Аввал “Фенербаҳче”да сўнгра эса, “Галатасарой”да ўйнаган футболчилар сони 21 нафар. Энг қизиғи эса, аввалига “Галатасарой”, сўнг “Фенербаҳче”да тўп сурган футболчилар сони ҳам шунча.
Туркия кубогини энг кўп қўлга киритган жамоа «Галатасарой»дир. “Сариқ қизиллар” 15 марта кубокни қўлга киритишга муваффақ бўлишган
