Трамп енгилмоқда

Дональд Трамп 2020 йил ноябрида бўлиб ўтадиган АҚШ президентлигига сайловларда рақиби бўлиши кутилаётган Демократлар партиясининг 5 нафар вакилидан сайловчилар ўртасида маъқулланиш бобида ортда қолмоқда. Langer Research Associates социологик хизмати томонидан ўтказилган сўров натижалари шуни кўрсатмоқда, дея хабар берди «ТАСС».

Таҳлилларга кўра, Демократлар партиясидан АҚШ президентлигига номзод сифатида илгари сурилишга 5 нафар сиёсатчининг имконияти юқори ҳисобланади. Гап собиқ вице-президент Жозеф Байден, Вермонт штатидан сенатор Берни Сандерс, Массачусец штатидан сенатор Элизабет Уоррен, Саут-Бенда шаҳри мери Пит Буттежаж ва Калифорниядан сенатор Камал Харрис ҳақида кетмоқда.

Сўров натижаларида келтирилишича, агар АҚШ президенти сайловлари ҳозир ўтказилганда, Трамп юқоридаги беш сиёсатчининг ҳар бирига ютқазган бўларди. Жумладан, агар Байден демократлар вакили бўлганида сайловчиларнинг 56 фоиз овозини олган,Трамп эса 39 фоиз овоз билан қолган бўларди. Сандерс рақиб бўлганида ҳам шундай натижа қайд этиларди.

Уоррен Трампни 54 га 39, Буттежаж 51 га 40, Харрис эса 52 фоизга 41 фоиз нисбати билан ортда қолдирган бўларди.

Трампнинг ўзи олдинроқ бир неча бор ОАВ буюртмасига асосан ўтказиладиган бу каби сўров натижаларига ишонмаслигини билдирган.