Толибон гендер дискриминацияси учун Халқаро Суд томонидан жавобгарликка тортилади
Афғонистонга халқаро суд муҳокамаларидан олдин олти ой муҳлат берилади, деб ёзади The Guardian.
Канада, Австралия, Германия ва Нидерландия чоршанба куни Толибонни гендер дискриминацияси юзасидан Халқаро судга топширишга қарор қилди. Бу ҳақда айни пайтда Нью-Йоркда бўлиб ўтаётган БМТ Бош Ассамблеясининг 79-сессиясида маълум қилинди.
Иш БМТ томонидан 1979 йилда қабул қилинган ва 1981 йилда кучга кирган Аёлларга нисбатан камситишнинг барча шаклларига барҳам бериш тўғрисидаги конвенция асосида қўзғатилган. Афғонистон Конвенцияни 2003 йилда, 2021 йилда Толибон ҳокимиятга келишидан олдин ратификация қилган.
Мутахассисларнинг фикрича, бу қадам мамлакатларнинг Афғонистон раҳбарияти билан дипломатик алоқалар ўрнатишига йўл очиши, иккинчи томондан, инсон ҳуқуқлари бузилгани учун уларни жавобгарликка тортиши мумкин.
Мисли кўрилмаган қонуний ҳаракат Афғонистонга жавоб бериш учун олти ой вақт беради. Унгача халқаро суд тингловлар ўтказиб, вақтинчалик чоралар кўришни таклиф қилиши мумкин. Ҳуқуқшунослар фикрича, агар Толибон суд қарорини эътиборсиз қолдирса, Халқаро суд қарори бошқа давлатларга Афғонистон режими билан дипломатик муносабатларни нормаллаштиришга имкон бермайди. Халқаро Судни имзолаган давлатлар одатда унинг қарорларини бажаришга мажбурдирлар.
Эслатиб ўтамиз, даъвони уч аёл ташқи ишлар вазири қўллаб-қувватлаган: австралиялик Пенни Вонг, германиялик Анналена Бербок ва канадалик Мелани Жоли. Нидерландия ташқи ишлар вазири Каспар Велдкамп ҳам бу ташаббусни қўллаб-қувватлади.
