Суперлига. 3-тур ўйинларида йўл қўйилган камчиликлар учун жазолар тайинланди

27-29 март кунлари Суперлига 3-тур беллашувлари бўлиб ўтди. Унда фаолият олиб борган Лига комиссарлари расмий ўйинни ташкил этиш масаласида қатор камчиликларни қайд этди.

"Хоразм" - "Бухоро" - 1:4

Учрашув якунида "Хоразм" клуби раҳбари Рўзимбой Аҳмедов ҳамда "Бухоро" клуби бош мураббийи Улуғбек Бақоев ўртасида жанжал юзага келган. Лига ҳар икки клуб ўртасидаги принципиалликни ҳурмат қилади ва мутахассисларни сабрли бўлишга чақиради. Мазкур иш ЎФА тегишли қўмитаси томонидан кўриб чиқилади.

Шунингдек, "Хоразм" футбол клуби “Суперлига ва Пролига регламенти”нинг 15.17-бандига амал қилмагани учун жаримага тортилади.

"Қизилқум" - ОКМК - 1:3
"Қизилқум" клуби регламентнинг 16.24-бандига беэътибор бўлгани учун расман огоҳлантирилади. Келгусида бу каби ҳолат жарима интизом чораси қўлланилишига олиб келади.

"Бунёдкор" - "Сурхон" - 3:1
"Сурхон" мураббийи Станислав Кудряшов Лига комиссарининг қатор огоҳлантиришларига қарамай, регламентнинг 16.22-бандига нисбатан ҳурматсизлик кўрсатган. Мутахассис билан бу каби ҳолат биринчи бор кузатилмаган. Шунинг учун унга нисбатан жарима интизом чораси қўлланилади. Ҳолат такрорланса, унинг келгуси учрашувларда техник зонага қўйилмаслиги масаласи кун тартибига киритилади.

"Навбаҳор" - "Андижон" - 2:2

Учрашувнинг биринчи бўлимига қўшиб берилган дақиқаларда "Навбаҳор" аъзоси Шоҳмалик Комилов меҳмон жамоа мухлисларига нисбатан провокацион ҳаракатни амалга оширди ва кичик тартибсизлик келиб чиқишига сабабчи бўлди. Лига бу каби ҳолатлар жавобсиз қолмаслигини таъминлайди. Кейинроқ футболчи меҳмон жамоа мухлислари жой олган секторга яқинлашиб, улардан расман узр сўради. Лига Комилов ўз хатосини тушунганини қадрлайди, шунингдек, регламент олдида ҳамма бирдек жавобгар эканидан келиб чиқиб, унга нисбатан ЎФА тегишли қўмитасининг қарори чиқарилади.

Учрашув якуни арафасида "Навбаҳор" футболчиси Саидазамат Мирсаидов ҳамда "Андижон" дарвозабонлари мураббийи Қобилжон Олимжонов ўртасидаги жанжал масаласи ҳам ЎФА тегишли қўмитасида кўриб чиқилади.

"Навбаҳор" клуби учрашувни ташкил қилишда Лига комиссари вазифасини қийинлаштирувчи, техник зона юкламасига сабаб бўлувчи қатор камчиликларга йўл қўйди. Жумладан, ОАВ учун мўлжалланган медиа трибунадан буткул бегона шахслар жой олди ва улар комиссар огоҳлантиришига беписанд муносабатда бўлиб, қўполлик қилган, журналистлар эркин ишлаши учун халал берган. Иккинчи бўлимда техник зонани бошқариш қийинлашиб, мезбон клуб вакиллари томонидан қатор тартибсизлик содир этилган.

"Навбаҳор" клуби вакили Абдурауф Ғуломов майдон атрофида ўзини номуносиб тутган, қўшимчасига, учрашув якуни билан техник зонада тамаки чекишни бошлаган. Мазкур ҳолатлар инобатга олиниб, "Навбаҳор" мезбонлигида ўтган учрашувдаги ҳолатлар қўмитада кўриб чиқилади.

"Пахтакор" - "Динамо" - 0:1

"Пахтакор" фан-клуби аъзоси расмий тадбир бошланган вақтда ўз фарзанди билан майдонга тушиб келган ва уни майдон фонида суратга олган. Мазкур ҳолатга клуб хавфсизлик офицери ҳеч қандай муносабат билдирмаган.

"Пахтакор" футбол клуби регламентнинг 16.4-бандига нисбатан беписанд муносабатда бўлган ва учрашув Countdown’ига амал қилмаган. Мазкур икки ҳолатдан келиб чиқиб, клубга нисбатан жарима интизом чораси қўлланилади.

"Машъал" - "Сўғдиёна" - 1:0

"Машъал" клубининг дарвозабонлар мураббийи Элдор Исабоев, клуб маъмури Фарҳод Ёров, шунингдек, "Сўғдиёна" мураббийи Улуғбек Боқаев регламентнинг 16.22-бандига амал қилмагани учун жаримага тортилади.

"Машъал" техник директори Дилявер Ваниев регламентнинг 16.30-банди юзасидан расман огоҳлантирилади. Клуб мутахассис хатти-ҳаракатларига нисбатан тушунтириш бериши сўралади.