ССВ: “ҚИШЛОҚ ШИФОКОРИ” ДАСТУРИ БЎЙИЧА ШИФОКОРЛАРГА 30 МИЛЛИОН СЎМДАН ПУЛ МАБЛАҒИ БЕРИЛМОҚДА

Чекка ҳудудларда яшовчи аҳолига сифатли тиббий хизмат кўрсатиш узоқ йиллар соғлиқни сақлаш тизимининг энг оғриқли муаммоларидан бири бўлиб келган. Албатта, бунинг ўзига хос бир неча сабаблари мавжуд. Энг аввало, бу – соғлиқни сақлаш тизимидаги кадрлар етишмаслиги масаласи билан боғлиқ. Қолаверса, аксарият мутахассис ёки ёш кадр барча қулайлик ва шароитлар мавжуд бўлган жойни ташлаб, чекка ҳудудларда фаолиятини давом эттиришга ҳамиша ҳам қизиқиш билдирмайди. Бунинг учун эса уларга рағбат ва имтиёз тизими жорий этилиши лозим. Бу борада амалга оширилаётган ишлар ҳақида Соғлиқни сақлаш вазирлиги бош бошқарма бошлиғи Умидилло РИСКИЕВ ССВ Матбуот хизматига сўзлаб берди:

— Соҳадаги ушбу муаммога зарур ечим топиш мақсадида Президентимизнинг 2020 йил 12 ноябрдаги “Бирламчи тиббий-санитария ёрдами муассасалари фаолиятига мутлақо янги механизмларни жорий қилиш ва соғлиқни сақлаш тизимида олиб борилаётган ислоҳотлар самарадорлигини янада ошириш чора-тадбирлари тўғрисида”ги фармони қабул қилиниб, 2021 йилдан юртимизда “Қишлоқ шифокори” дастури жорий қилинди.

Шунингдек, давлатимиз раҳбарининг жорий йил 5 майдаги “Соғлиқни сақлаш тизимида олиб борилаётган ислоҳотларни изчил давом эттириш ва тиббиёт ходимларининг салоҳиятини ошириш учун зарур шарт-шароитлар яратиш тўғрисида”ги фармони билан тасдиқланган “Йўл харитаси” 7-бандида олис ва чекка ҳудудлардаги шифокорларга бўлган эҳтиёжни қоплаш учун “Қишлоқ шифокори” дастурини самарали амалга оширишда 3 та босқич кўрсатиб ўтилган:

Биринчиси – шу йил 1 июнгача олис ва чекка ҳудудлардаги шифокорларга бўлган эҳтиёждан келиб чиқиб, бўш шифокор иш ўринлари рўйхатини тузиш ва талабгорларни ҳар бир маҳалла кесимида аниқлаш;

Иккинчиси – 2022 йил 1 августгача “Қишлоқ шифокори” дастури доирасида талабгорлар билан шартномалар имзолаш, уларга уй-жой ажратиш ва тегишли маблағлар тўланишини таъминлаш;

Учинчиси – 2021 йил 1 октябрь ва 2022 йил 1 январда “Қишлоқ шифокори” дастури ижроси юзасидан Вазирлар Маҳкамасига ахборот киритиш.

Президентимизнинг 2020 йил 12 ноябрдаги фармонига мувофиқ, чекка ҳудудларга бориб ишлайдиган тиббиёт ходимларига бир неча имтиёзлар берилиши кўзда тутилган. Хусусан, чекка ҳудудлардаги бирламчи бўғинга ишга кирган тиббиёт ходимларига 30 миллион сўм миқдорида бир марталик пул маблағи берилади, улар хизмат уйи билан таъминланади ёки ижара тўлови компенсация қилинади.

Таъкидлаш лозимки, ҳозирги кунда юртимиздаги 243 та маҳалла фуқаролар йиғинлари олис ва чекка ҳудуд сифатида белгиланган. Мазкур худудларда Республика бўйича жами 86 та оилавий шифокорлик пункти ва 39 та оилавий поликлиника ва уларда 149 та вакант штат мавжуд.

Айниқса, Сурхондарё, Навоий, Самарқанд ҳамда Фарғона вилоятларининг олис ҳудудларида малакали тиббиёт ходимларига эҳтиёж катта.

Эътиборлиси, “Қишлоқ шифокори” дастури жорий қилинганидан бошлаб, бугунги кунгача 41 нафар тиббиёт ходими 51 ставкага ишга қабул қилинди. Шу билан бирга, ҳозирча 16 нафар, яъни Навоий вилоятида – 7 нафар, Сурхондарё вилоятида – 3 нафар, Фарғона вилоятида – 4 нафар ва Хоразм вилоятида – 2 нафар тиббиёт ходимига 30 миллион сўмдан пул маблағи тўлаб берилди.