Шу ростми? Қуръондаги чигиртка балоси Ўзбекистон устига ҳам ёғилиши мумкин

Ўтган июл ойида дунёда кузатилган иккита чигиртка ёмғири ҳаммани ҳайратга солди. Аввал чигирткалар Лас-Вегас устига ёғди. Кейин минглаб чақирим узоқда, урушлардан силласи қуриган Яман устига чигиртка ёпирилди. Чигирткалар йўлда дуч келган экинни еб битиради.

Яқин келажакда Африка, Яқин Шарқ ва Марказий Осиёдаги жами 60 мамлакат устига мўр-малах ёпирилиши мумкин. Демак, булар орасида Ўзбекистон ҳам бор, деб ёзмоқда "minbar.uz".

Ўзбекистон аксар саҳро, чўл ва чалачўл бўлиб, Африка ва Яқин Шарқдан чиққан чигирткалар сакраб-сакраб тўсиқсиз келиши мумкин. Ўртада баланд тоғлар ёки улкан денгизлар йўқ.

Энг хавотирли жиҳати – бу мамлакатларда чигиртка ёмғирлари тез-тез рўй бериши кутилади ва озиқ-овқат таъминотини издан чиқариши эҳтимоли ортиб бораётир.

Очофат мўр-малах

Жаҳонда иқлим исиши қурт-қумурсқалар, хусусан, чигирткаларнинг овқат ҳазм қилиш хусусиятини ўзгартириб юборган.

2018 йили АҚШ олимлари тарафидан Science («Илм-фан») журналида чоп этилган тадқиқот натижаларига биноан исиётган об-ҳаво боис чигирткалар фаоллашиб, жадал кўпайишлари учун қулай имконият яратилади.

Айни пайтда уларниинг иштаҳаси ҳам очилади: чўл чигирткаси бир кунда ўз танасига тенг миқдорда озиқ-овқат ейди.

Ҳар бир даража исиган ҳарорат – чигирткалар етказадиган зарар 10-25 фоиз кўпаяди дегани.

Иқлим исиб бораркан, буғдой, шоли, маккажўхори ва бошқа экинларни йиғиб олмасдан туриб, уларни чигирткалар еб битира бошлайди.

Айниқса, катта миқдорда буғдой ва шоли экиладиган мамлакатлар кўп азият чекиши мумкин.

Нафақат чигирткалар, умуман, экин-тикинни ейдиган бошқа қурт-қумурсқалар ҳам кўпайиши кутилади.

Айниқса, Ўзбекистон каби қуруқ иқлимли, тропик бўлмаган мамлакатларда чигирткалар тез кўпаяди.

Об-ҳаво қанча исиса, чигирткалар ҳам шунча тез кўпаяди. Бошқа қурт-қумурсқалар ҳам кўпайса-да, аммо экинларни еб тугатиш бобида ҳеч қайси чигирткага етмайди.

Африкада охирги йиллари чигирткалар икки ярим миллиард долларлик зарар етказган. Дунё миқёсида олганда, озиқ-овқат таъминотига чигиртка етказадиган зиён кичик – атиги 0,02 фоиз. Аммо чигиртка балосига дуч келган мамлакатда айни кўрсаткич анча баланд бўлиши ва инсоний ёки иқтисодий инқирозга йўл очиши эҳтимоли йўқ эмас.

«Келажакда иқлим янада қуруқлашиши чигирткалар тарқалиши учун қулай шароит яратади ва оқибати ёмон бўлади», – дейди чигирткалар бўйича дунёдаги етакчи мутахассислардан бири Мишел Ликок.

«Кўплаб ривожланаётган давлатларда экин-тикинга, ўтлоқларга, озиқ-овқат таъминотига ва, алал оқибатда, камбағал инсонларнинг дастурхонига етадиган зарар улкан бўлиши мумкин», – деб таъкидлайди олим.

Қадимий офат

Чигиртка балоси Инжил ва Қуръони каримда ҳам тасвирланган. БМТ Озиқ-овқат ташкилоти эса чўл чигирткаси кўпайиши дунё аҳолисининг 10 фоизига зарар етказади деб хавотирланмоқда.

Кичкина чигиртка галаси бир кунда 35 минг одам ейдиган озиқ-овқатни ямламай ютиб юборади. Чигирткалар шоли, буғдой, арпа ва маккажўхорини жуда яхши кўради.

Чигирткани инсоният азалдан бало-қазо деб билган ва қадимий илоҳий китоблар – Библия ва Қуръонда ҳам эслатилган.

Қадимий Рим тарихчиси Плини Элдернинг ёзишича, чигиртка балоси туфайли Ливия, Жазоир ва Тунисда 800 минг одам нобуд бўлган.

Ўтган аср ўртасида – 1958 йили эса Эфиопияни босган чигирткалар 167 минг тонна ғаллани еб битирган. Бунча дон бир миллион одамни бир йил боқишга етарди.

Очофат чигирткалар бир неча ҳафтада бутун бошлик мамлакатни очлик ёқасига келтириб қўйиши мумкин.

Баланд ва узоқ учаётган мўр-малах

Чигирткалар метаболизми иқлим исиши билан секинлашиб бормоқда. Об-ҳаво ўзгариши туфайли қиш фаслининг илиқ ва нам келиши ҳам чигирткаларни кўпайтираяпти.

Чўл чигирткаси галалари бир кунда 150 километр масофани учиб ўтмоқда. Кун қанчалик кўп исиса, уларнинг учиши бундан ҳам тезлашади.

Футбол бўйича 2014 йилги жаҳон чемпионатига ҳам чигирткалар етиб келганди.  Иссиқ ҳавода улар баландроқ учади ва тоғ, қир каби табиий тўсиқлардан ҳам ошиб ўтаверадилар.

Агар шамол йўналиши ўзгариб қолса, янгидан-янги ҳудудларга етиб борадилар. «Иқлим ўзгараётгани боис чигирткалар тез-тез пайдо бўлиб, янада каттароқ зарар етказа бошлашади», – дейди Аризона университети олими Арианна Сииз.

Нафақат чигиртка ейдиган шолипоя ёки буғдойзорлар хавф остида қолади, балки бошқа экинларга ҳам қурт-қумурсқа таҳдиди кучаяди. Масалан, пахта ҳам қурт-қумурсқадан азият чекади.

Покистон аллақачон пахтазорларини босган қурт-қумурсқа қаршисида қолмоқда. Пахта – Покистон четга сотадиган маҳсулотларнинг ярмини ташкил этади.